অৱশেষত চূড়ান্ত হ’ল জুবিন গাৰ্গৰ (Zubeen Garg) শেষকৃত্য তথা সমাধি ক্ষেত্ৰৰ স্থান। জুবিন পত্নী গৰিমা গাৰ্গক সাক্ষাতৰ পিছত এক সংবাদমেলযোগে তেওঁৰ ইচ্ছাৰ কথা সদৰী কৰে মন্ত্ৰী ৰনোজ পেগুৱে।
জুবিনৰ পৰিয়ালৰ ইচ্ছা অনুযায়ী সোণাপুৰৰ হাতীমূৰাত হ’ব জুবিন গাৰ্গৰ সমাধি। দিচাং ৰিজ’ৰ্টৰ সমীপত কমাৰকুছিত হ’ব জুবিনৰ সমাধি।উল্লেখযোগ্য যে জুবিনৰ সমাধিৰ বাবে যোৰহাটৰ ৰাইজেও দাবী উত্থাপন কৰিছিল। আনহাতে, গুৱাহাটীৰ আশেপাশে কেইবাটাও স্থান চিনাক্ত কৰা হৈছিল।
ইয়াৰ পিছত মুখ্যমন্ত্ৰী ডঃ হিমন্ত বিশ্ব শৰ্মাই মন্ত্ৰী কেশৱ মহন্ত, বিমল বৰা আৰু ৰনোজ পেগুক জুবিনৰ পৰিয়ালৰ সৈতে আলোচনাৰ দায়িত্ব প্ৰদান কৰে।
ইয়াৰ পিছত মন্ত্ৰী তিনিগৰাকীয়ে গৰিমা গাৰ্গ আৰু তেওঁলোকৰ পৰিয়ালৰ সৈতে আলোচনা কৰে। ৰনোজ পেগুৱে সংবাদমেলত জনোৱা মতে, গৰিমা গাৰ্গে যোৰহাটবাসীৰ আবেগক সন্মান জনোৱাৰ লগতে তেওঁলোকৰ দাবীৰ প্ৰতি কৃতজ্ঞতা জনাইছে।
কিন্তু তেওঁৰ পিতৃৰ যিহেতু যথেষ্ট বয়স হৈছে আৰু অসুস্থ, সেয়ে এই সময়ত যোৰহাটলৈ যোৱাত অসুবিধা হ’ব। সেয়ে গুৱাহাটীৰ আশেপাশে হ’লে ভাল হয়। সেয়ে সোণাপুৰৰ উক্ত স্থান চূড়ান্ত কৰা বুলি মন্ত্ৰী ৰনোজ পেগুৱে জনায়।
