যোৱা ৯ এপ্ৰিলত এইবাৰ একেটা পৰ্যায়তে অনুষ্ঠিত হয় অসম বিধানসভাৰ নিৰ্বাচন। কোনো ধৰণৰ হানি-বিঘিনি নোহোৱাকৈ এইবাৰ সমাপ্ত হয় নিৰ্বাচন। অৱশ্যে এগৰাকী নিৰ্বাচনী বিষয়াৰ বিশ্বনাথ জিলাত দায়িত্ব পালন কৰি থকা অৱস্থাতে মৃত্যু হয়।
অৱশ্যে দুই এটা বিক্ষিপ্ত ঘটনাৰ বাহিৰে ভোট গ্ৰহণ প্ৰক্ৰিয়া শান্তিপূৰ্ণভাৱে সমাপ্ত হয়। কিন্তু তাৰ মাজতে কাৰ্বি আংলং জিলাত সংঘটিত হৈছে এক হৃদয় বিদাৰক ঘটনা। ৯ এপ্ৰিলত নিৰ্বাচনী দায়িত্ব পালন কৰিবলৈ গৈ আজিও নিৰুদ্দেশ এগৰাকী শিক্ষক। টেট শিক্ষকগৰাকী নিৰুদ্দেশ হৈ থকাৰ খবৰে কাৰ্বি আংলং জিলাত চাঞ্চল্যৰ সৃষ্টি কৰিছে৷
৯ এপ্ৰিলত বিধানসভা নিৰ্বাচনত কাৰ্বি আংলং আৰু নগাঁও জিলাৰ সীমান্তৱৰ্তী ৰংমংৱে মণ্ডলৰ অন্তৰ্গত ১৯ নং চাৰ্পো কাথাৰ প্ৰাথমিক বিদ্যালয়ত তৃতীয় প’লিং বিষয়াৰূপে দায়িত্ব পালন কৰিছিল কৰ্ণেলিয়াছ কিন্দো নামৰ শিক্ষকগৰাকীয়ে৷ কিন্তু নিৰ্বাচনৰ দায়িত্ব শেষ হোৱাৰ পিছতো আজি পৰ্যন্ত তেওঁ নিজগৃহত উপস্থিত হোৱা নাই।
ইফালে তেওঁ ঘৰলৈ উভতি নহাত পৰিয়ালৰ লোকে খবৰ কৰাত তেওঁৰ সৈতে নিৰ্বাচনী দায়িত্বত যোৱা বিষয়াসকলে জনায় যে গা বেয়ালগা বুলি তেওঁ ওলাই আহিছিল
তাৰ পিছত তেওঁ ক’লৈ গ’ল সেই বিষয়ে তেওঁলোকে একো নাজানে৷
উল্লেখযোগ্য যে ৰংমংৱেৰ পৰা ডিফু ধনশিৰিৰ ঘৰলৈ আহিবলৈ কোনো গাড়ী পোৱাতো সম্ভৱ নহয়৷ তাৰ মাজতে শিক্ষকগৰাকী নিৰুদ্দেশ হয়৷ ইফালে এই বিষয়টো সদৌ অসম আদিবাসী ছাত্ৰ সন্থাই জিলা আয়ুক্তক অৱগত কৰে। আনহাতে, আৰক্ষীয়েও তেওঁৰ সন্ধানত তদন্ত কৰিও কোনো সম্ভেদ লাভ কৰা নাই৷
আনহাতে, সদৌ অসম আদিবাসী ছাত্ৰ সন্থাৰ কাৰ্বি আংলং জিলা সমিতিৰ ভাৰপ্ৰাপ্ত সভাপতি বিক্ৰম গোৱালাৰ নেতৃত্বত এটি দলৰ লগতে বোকাজানৰ মহকুমা আৰক্ষী বিষয়াৰ লগত এটি দলে অঞ্চলটোত অভিযান চলায় যদিও তেওঁৰ সন্ধান কৰাত ব্যৰ্থ হয়৷ দ্ৰোণ কেমেৰাৰে সমগ্ৰ এলেকাটোৰ অৰণ্য আৰু নদীত দলটোৱে অভিযান চলায়৷ উল্লেখযোগ্য যে নিৰুদ্দেশ হোৱাৰ কিছু সময়ৰ পূৰ্বে তেওঁ পৰিয়ালৰ সৈতে বাৰ্তালাপ কৰি শাৰীৰিক অসুস্থতাৰ কথাও কৈছিল৷
ইফালে ভোট কেন্দ্ৰত কৰ্মৰত সহকৰ্মীসকলে জানিবলৈ দিয়া মতে, কৰ্ণেলিয়াছ কিন্দো নামৰ ব্যক্তি গৰাকীয়ে অসুস্থ হৈ ঘৰলৈ যাবলৈ বিচাৰে যদিও পৰৱৰ্তী সময়ত তেওঁৰ মোবাইলটো বন্ধ থাকে আৰু এতিয়াও বন্ধ হৈ আছে৷
কিন্তু তেওঁৰ মোবাইলৰ অন্তিম অৱস্থান বিশ্বনাথ জিলাৰ আশে-পাশে দেখুৱায়৷ উল্লেখযোগ্য যে কৰ্নেলিয়াছ কিন্দো কাৰ্বি আংলং জিলাৰ লুম্বাজং ব্লকৰ অন্তৰ্গত কঁঠালগুৰি নেপালী বস্তি এল পি স্কুলৰ ৰঙাপাহাৰ ক্লাষ্টাৰৰ টে’ট শিক্ষক হিচাপে কৰ্মৰত আছিল।
