ছবছৰ পূৰ্বে ছলমান খানে (Salman Khan) কৰ্কট ৰোগত আক্ৰান্ত শিশুটিক (Children suffering from cancer) দিয়া প্ৰতিশ্ৰুতি পালন কৰিলে। শেহতীয়াকৈ ৯ বাৰ কেমোথেৰাপিৰ অন্তত কৰ্কট ৰোগত জয়ী হোৱা কণমানি অনুৰাগীক বলীউডৰ ভাইজানে পুনৰ সাক্ষাৎ (Bhaijaan’s meeting again) কৰে।
২০১৮ চনত কৰ্কট ৰোগত আক্ৰান্ত হৈছিল জগনবীৰ। সেই সময়ত তেওঁৰ বয়স চাৰি বছৰ আছিল। জগনবীৰৰ পিতৃ-মাতৃয়ে পুত্ৰক লৈ চিকিৎসাৰ বাবে মুম্বাইলৈ যায়। জগনবীৰক মুম্বাইৰ টাটা মেম’ৰিয়েল চেণ্টাৰত ভৰ্তি কৰোৱা হয়। আনহাতে, মুম্বাইলৈ যাব বুলি খবৰ পোৱাৰ লগে লগে জগনবীৰে ছলমানক লগ পোৱাৰ সপোন দেখিবলৈ ধৰে। জগনবীৰৰ মাতৃ সুখবীৰ কৌৰে জানিছিল পুত্ৰৰ সপোনৰ কথা।
তেওঁ পুত্ৰ চিকিৎসালয়ত থকাৰ ভিডিঅ’ ৰেকৰ্ডিং কৰে। সেই ভিডিঅ’টোত জগনবীৰে ছলমানক লগ পোৱাৰ ইচ্ছা প্ৰকাশ কৰে। সেই ভিডিঅ’টো ছলমানৰ ওচৰ পায়গৈ। তাৰ পিছতেই জগনবীৰৰ সপোন বাস্তৱায়িত হয়। হস্পিটেললৈ গৈ ছলমানে জগনবীৰক লগ কৰে। যোৱাৰ পূৰ্বে ছলমানে জগনবীৰক কয় যে তেওঁ পুনৰ লগ হ’ব। কিন্তু এটা চৰ্ত আছে। জগনবীৰৰ আশু আৰোগ্যৰ প্ৰয়োজন। সুস্থ হৈ উঠিলে পুনৰ লগ পাব তেওঁক।
দ্বিতীয়বাৰৰ বাবে ছলমানক লগ পোৱাৰ ‘কামনা’ত জগনবীৰে অন্তৰেৰে সুস্থ হৈ উঠিব বিচাৰিছিল। চিকিৎসকৰ সকলো কথা আখৰে আখৰে পালন কৰে। কঠিন হ’লেও তেওঁ আশা এৰা নাছিল। অৱশেষত তেওঁ এই যুদ্ধত জয়লাভ কৰে। ৯ বাৰ কেমোথেৰাপিৰ পিছত এতিয়া কেন্সাৰমুক্ত হৈছে জগনবীৰ। সেইদিনাৰ সৰু ল’ৰাটো এতিয়া ৯ বছৰীয়া কিশোৰ। জগনবীৰৰ আৰোগ্যৰ কথা জানিবলৈ পাৰে ছলমানে। সেয়ে ৬ বছৰ পূৰ্বে দিয়া প্ৰতিশ্ৰুতি তেওঁ পালন কৰে। ছলমানৰ বান্দ্ৰাৰ ঘৰত জগনবীৰক লগ পায় ভাইজানে।
এই সন্দৰ্ভত জগনবীৰৰ মাতৃ সুখবীৰে কয়, “জগনবীৰ এতিয়া বহুত সুস্থ হৈ উঠিছে। আকৌ স্কুললৈ যাবলৈ আৰম্ভ কৰিছে। হৃদয়ৰ পৰা নিবিচাৰিলে ইমান সোনকালে সুস্থ হোৱা সম্ভৱ নাছিল। আৰু তেওঁ ভাল হ’বলৈ ইমান খৰখেদা কৰিছিল কেৱল ছলমানক লগ কৰিবলৈ যোৱাৰ বাবেই। ভাইজানৰ প্ৰতি আমি কৃতজ্ঞ।”
