‘পুষ্পা ২’ (Pushpa 2 Movie) ছবিৰ প্ৰিমিয়াৰত সংঘটিত হোৱা দুৰ্ঘটনা (Accident at the premiere) সন্দৰ্ভত ৰাষ্ট্ৰীয় মানৱ অধিকাৰ আয়োগে (National Human Rights Commission) তেলেংগানা আৰক্ষীৰ ডিজি আৰু হায়দৰাবাদৰ আৰক্ষী আয়ুক্তৰ পৰা প্ৰতিবেদন বিচাৰিছে (Asks for a report)। যোৱা ৪ ডিচেম্বৰত হায়দৰাবাদৰ সন্ধ্যা থিয়েটাৰত আল্লু অৰ্জুন অভিনীত ছবিখনৰ প্ৰিমিয়াৰত পদপিষ্ট হৈ মৃত্যু হৈছিল এগৰাকী মহিলাৰ। সেইদিনা সঠিকভাৱে কি হৈছিল তাৰ সবিশেষ জনাবলৈ আয়োগে আৰক্ষীক জনাইছে। আগন্তুক চাৰি সপ্তাহৰ ভিতৰত প্ৰতিবেদন দাখিল কৰিবলৈ কোৱা হৈছে।
সন্ধ্যা থিয়েটাৰত পদপিষ্ট হৈ হোৱা মৃত্যু সন্দৰ্ভত ৰাষ্ট্ৰীয় মানৱ অধিকাৰ আয়োগৰ ওচৰত অভিযোগ দাখিল কৰিছে এগৰাকী অধিবক্তাই। উক্ত অভিযোগৰ পৰিপ্ৰেক্ষিতত আয়োগে আৰক্ষীৰ পৰা প্ৰতিবেদন বিচাৰি পত্ৰ প্ৰেৰণ কৰিছে। অধিবক্তাগৰাকীৰ মতে, সেইদিনা আৰক্ষীৰ লাঠিচালনাৰ বাবে সাধাৰণ ৰাইজৰ মাজত আতংকৰ সৃষ্টি হৈছিল। ইয়াৰ ফলস্বৰূপে এক অভাৱনীয় পৰিস্থিতিৰ সৃষ্টি হোৱা বুলি তেওঁ আয়োগক জনায়। আল্লু ছবিগৃহত উপস্থিত হোৱাৰ পিছতো প্ৰয়োজনীয় পৰিচালনা ব্যৱস্থা পৰ্যাপ্ত নাছিল বুলিও তেওঁ অভিযোগ কৰে।
আনহাতে, ৪ ডিচেম্বৰৰ পদপিষ্ট কাণ্ডৰ পিছত মানুহৰ মনত আৰক্ষীৰ ভূমিকা সম্পৰ্কেও প্ৰশ্ন উত্থাপন হ’বলৈ ধৰে। এনে ‘হাই-প্ৰফাইল’ অনুষ্ঠানত আৰক্ষীৰ আচৰণ আৰু ভিৰ পৰিচালনাৰ ধৰণ দেখি এটা অংশৰ মাজত অসন্তুষ্টিৰ সৃষ্টি হৈছে। তাৰে পৰিপ্ৰেক্ষিতত হায়দৰাবাদত আল্লুৰ ছবিখনৰ প্ৰিমিয়াৰত পদপিষ্ট হোৱাৰ ঘটনাক লৈ ৰাষ্ট্ৰীয় মানৱ অধিকাৰ আয়োগে ব্যৱস্থা গ্ৰহণ কৰে।
উল্লেখযোগ্য যে যোৱা ৪ ডিচেম্বৰত হায়দৰাবাদৰ সন্ধ্যা থিয়েটাৰত ‘পুষ্পা ২: দ্য ৰুল’ৰ প্ৰিমিয়াৰত সংঘটিত হয় এই দুৰ্ঘটনা। নিশা প্ৰায় ৮ বজাত অভিনেতাগৰাকীয়ে ছবিখনৰ প্ৰিমিয়াৰত উপস্থিত হোৱাৰ লগে লগে অনুৰাগীৰ যথেষ্ট ভিৰ হয়। ভিৰৰ মাজত পদপিষ্ট হৈ মৃত্যু হয় এগৰাকী ৩৫ বছৰীয়া মহিলাৰ। তেওঁৰ ৯ বছৰীয়া পুত্ৰও গুৰুতৰভাৱে আহত হয়। ঘটনাৰ পিছতে অভিনেতাজনক গ্ৰেপ্তাৰ কৰা হয়। নিম্ন আদালতে তেওঁক ন্যায়িক জিম্মালৈ প্ৰেৰণ কৰাৰ নিৰ্দেশ দিয়ে যদিও পিছত তেলেংগানা উচ্চ ন্যায়ালয়ে জামিনত মুকলি কৰি দিয়ে অভিনেতাগৰাকীক।
