অভিনেতা টাইগাৰ শ্ৰফক (Tiger Shroff) লক্ষ্য কৰি গুলীচালনাৰ ঘটনাক লৈ চিন্তিত হৈ পৰিছে বলীউড জগত। এইবাৰ টাইগাৰ শ্ৰফক হত্যাৰ চেষ্টা কৰাৰ অভিযোগত তিনিজন লোকক গ্ৰেপ্তাৰ কৰিছে আৰক্ষীয়ে। ৰাজস্থানৰ কোটা ষ্টেচনত ৰে’লত যাত্ৰা কৰি থকা অৱস্থাত ধৰা পৰে দুজন। গ্ৰেপ্তাৰ হোৱা দুজন হাৰিয়ানাৰ বাসিন্দা, আনজন মহাৰাষ্ট্ৰৰ। তিনিওজনেই লৰেন্স বিষ্ণৈ গেঙৰ সৈতে জড়িত বুলি তদন্তকাৰীয়ে দাবী কৰিছে।
সংবাদ সংস্থাৰ সূত্ৰ অনুসৰি, তদন্তকাৰীৰ প্ৰাৰম্ভিক ধাৰণা হৈছে যে এই আক্ৰমণৰ আঁৰত প্ৰশিক্ষণপ্ৰাপ্ত হত্যাকাৰী আছিল। আক্ৰমণ চলোৱাৰ পূৰ্বে তেওঁলোকে টাইগাৰৰ গতিবিধি নিৰীক্ষণ কৰিছিল। অভিনেতাগৰাকীৰ দৈনন্দিন ৰুটিনৰ বিষয়ে জনাৰ পিছতে এই আক্ৰমণৰ পৰিকল্পনা কৰা বুলি অনুমান কৰা হৈছে।
সূত্ৰ অনুসৰি, টাইগাৰ শ্ৰফ প্ৰতি দেওবাৰে জুহু ফুটবল খেলপথাৰলৈ গৈছিল। সেই অভ্যাসৰ বিষয়ে অভিযুক্তই জানিছিল। তদন্তকাৰীয়ে সন্দেহ কৰিছে যে দেওবাৰে অভিনেতাজনে গাড়ীৰে খেলপথাৰপৰা উভতি অহাৰ সময়ত তেওঁক আক্ৰমণ কৰাৰ পৰিকল্পনা কৰিছিল। গুলীচালনাৰ পিছত ইতিমধ্যে আক্ৰমণকাৰীয়ে পলায়নৰ পৰিকল্পনা কৰিছিল। অভিযোগ অনুসৰি, মুম্বাইৰ ভিল পাৰ্লে আৰু আন্ধেৰী হৈ এছ ভি ৰোডৰ কাষেৰে অভিযুক্ত আগবাঢ়িছিল। পিছত মটৰবাইকখন আন্ধেৰী পশ্চিম ৰে’লৱে ষ্টেচনৰ সমীপত এৰি বাৰিৱলী অভিমুখে যোৱা এখন ৰে’লত উঠে।
প্ৰাৰম্ভিক চোৰাংচোৱা তথ্যৰ ভিত্তিত তদন্তকাৰীয়ে সন্দেহ কৰিছে যে অভিযুক্তই মহাৰাষ্ট্ৰ সীমান্ত পাৰ হৈ চুবুৰীয়া ৰাজ্য গুজৰাটত প্ৰৱেশ কৰি আৰক্ষীক বিভ্ৰান্ত কৰিবলৈ চেষ্টা কৰিছিল। তদন্তকাৰীয়ে তেওঁলোকৰ গতিবিধিৰ তদন্ত কৰি আছে।
