বলিউডত পৰিছে পুনৰ শোকৰ ছাঁ। ছলমান খানৰ (Salman Khan) ‘বডিগাৰ্ড’ ছবিৰ পৰিচালক ছিদ্দিকী ইছমাইলৰ (Siddique Ismail) মৃত্যু।কিছুদিন পূৰ্বে ৰাষ্ট্ৰীয় বঁটা বিজয়ী কলা পৰিচালক নীতিন দেশায়ে নিজৰ ষ্টুডিঅʼত চিপ লৈ আত্মহত্যা কৰাৰ পিছত পুনৰ আহিছে দুঃসংবাদ।
সোমবাৰে বিয়লি হৃদৰোগত আক্ৰান্ত হোৱাত পৰিচালকজনক ততাতৈয়াকৈ কোচিৰ এখন ব্যক্তিগত চিকিৎসালয়লৈ প্ৰেৰণ কৰা হয়। ৩০ ঘণ্টা মৃত্যুৰে যুঁজ দিয়াৰ পিছতো শেষৰক্ষা নহ’ল। মঙলবাৰে নিশা ৯ বজাত চিকিৎসালয়তে শেষ নিশ্বাস ত্যাগ কৰে বিখ্যাত পৰিচালকগৰাকীয়ে। মৃত্যুৰ সময়ত তেওঁৰ বয়স আছিল ৬৩ বছৰ।
কেইবাদিনো ধৰি তেওঁ নিউমোনিয়া আৰু লিভাৰৰ সমস্যাত ভুগি আছিল। তেওঁ চিকিৎসাধীন হৈ থকা অৱস্থাতে হঠাৎ হাৰ্ট এটেক হয়। ফলত গোটেই দিনটো তেওঁক একমো চাপোৰ্টত ৰখা হয়। পিছত পৰিচালকজনক ভেণ্টিলেটৰত ৰখা হয়। কিন্তু মালয়ালম ছবিৰ এইগৰাকী জনপ্ৰিয় পৰিচালকে মঙলবাৰে নিশা শেষ নিশ্বাস ত্যাগ কৰে।
আশীৰ দশকৰ পৰা তেওঁৰ কেৰিয়াৰ আৰম্ভ হৈছিল। তিনি দশকৰো অধিক সময় দক্ষিণৰ ছবিৰ সৈতে জড়িত আছিল তেওঁ।
‘ৰামাজী ৰাও স্পীকিং’ৰ সৈতে পৰিচালনা কৰিছিল তেওঁ। তাৰ পিছত তেওঁ ‘গডফাদাৰ’, ‘কাবুলীৱালা’, ‘হিটলাৰ’, ‘ফ্ৰেণ্ডছ’, ‘ভিয়েটনাম কলনী’ৰ দৰে হিট ছবি দিছিল। হিন্দী ভাষাত তেওঁৰ বহু বেছি ছবি নহ’লেও প্ৰথম ছবিখনেই হিট হৈছিল। ‘হলচল’ ছবিৰে বলীউডত অভিষেক ঘটায়। তেওঁ আছিল প্ৰিয়দৰ্শনৰ পৰিচালনাত নিৰ্মিত এই ছবিখনৰ চিত্ৰনাট্যকাৰ।
ইয়াৰ পিছত ২০১১ চনত তেওঁ ছলমান খান, কৰীনা কাপুৰ অভিনীত ছবি ‘বডিগাৰ্ড’ পৰিচালনা কৰে।তেওঁৰ অন্তিমখন ছবি আছিল মোহনলাল আৰু আৰবাজ খান অভিনীত ‘বিগ ব্রাদাৰ’। তেওঁৰ মৃত্যুৰ খবৰত দক্ষিণৰ ছবি জগত মৰ্মাহত হৈছে।
