হোলীৰ (Holi) দিনা দম্পতীৰ ৰহস্যজনক মৃত্যু। বাথৰুমৰ পৰা উদ্ধাৰ কৰে তেওঁলোকৰ মৃতদেহ। আৰক্ষীৰ মতে, হোলী উদযাপনৰ পিছত তেওঁলোকৰ মৃত্যু হয়। কিন্তু এই মৃত্যু কেনেকৈ হ’ল, সেয়া জানিব পৰা হোৱা নাই।
মুম্বাইৰ (Mumbai) ঘাটকোপাৰ অঞ্চলত সংঘটিত হৈছে এই ঘটনা। তাত এটা এপাৰ্টমেণ্টৰ ষষ্ঠ মহলাত বাস কৰিছিল দম্পতীটোৱে। বুধবাৰে ফ্লেটটোৰ বাথৰুমৰ পৰা উদ্ধাৰ কৰে স্বামী-স্ত্ৰীৰ মৃতদেহ। গৃহকৰ্মীগৰাকীয়ে প্ৰথমে তেওঁলোকক দেখা পায়। ইয়াৰ পিছত চিনাকি মানুহে আৰক্ষীক খবৰ দিয়ে।
গৃহকৰ্মীয়ে জনোৱা মতে, আগতে ঘৰটোৰ ডুপ্লিকেট ছাবি ৰাখিছিল। বুধবাৰে তেওঁ ফ্লেটটোৰ দুৱাৰত তলা লগোৱা দেখি চাবিৰে দুৱাৰখন খুলি দিয়ে। ইয়াৰ পিছত তেওঁ দেখে যে স্বামী-স্ত্ৰী দুয়োজনেই বাথৰুমত পৰি আছে। এই দৃশ্য প্ৰত্যক্ষ কৰি লগে লগে দম্পতীটোৰ আত্মীয়ক খবৰ দিয়ে পৰিচাৰকগৰাকীয়ে। তেওঁলোক ওচৰৰ ফ্লেটত বাস কৰিছিল। আত্মীয়ই আহি আৰক্ষীক খবৰ দিয়ে।
পন্থন নগৰ থানাৰ ডিচিপি পুৰুষোত্তম কাৰাদে (purushottam Karad) জানিবলৈ দিয়া মতে, ঘটনাটোত আকস্মিক মৃত্যুৰ গোচৰ ৰুজু কৰা হৈছে। মৃতদেহ দুটা মৰণোত্তৰ পৰীক্ষাৰ বাবে প্ৰেৰণ কৰা হৈছে। মৃত ব্যক্তিজনৰ বয়স ৪২ বছৰ। মহিলাগৰাকীৰ বয়স ৩৯ বছৰ।
হোলী খেলি তেওঁলোকৰ মৃত্যু কেনেকৈ হʼল, কিয় বাথৰুমৰ পৰা উদ্ধাৰ হʼল মৃতদেহ, এই সকলোবোৰ প্ৰশ্ন ৰহস্যৰ আৱৰ্তত। আৰক্ষীয়ে ফ্লেটটোত তালাচী চলাইছে, দম্পতীহালৰ আত্মীয় আৰু পৰিচাৰিকাগৰাকীক জেৰা কৰি ঘটনাৰ সবিশেষ সংগ্ৰহ কৰিছে। দম্পতীহালৰ মৃত্যুৰ আঁৰত আন কিবা ষড়যন্ত্ৰ থাকিব পাৰে নেকি সেই বিষয়েও তদন্ত চলি আছে।
