সমগ্ৰ দেশতে উদযাপন কৰা হৈছে ৰঙৰ উৎসৱ ফাকুৱা (Holi)। শিশুৰ পৰা আৰম্ভ কৰি বৃদ্ধলৈকে সকলোৱে ৰঙৰ উৎসৱ উপভোগ কৰাত ব্যস্ত। কিন্তু এই ৰঙৰ উৎসৱে এজন যুৱকৰ জীৱনত ভয়ংকৰ পৰিণতি কঢ়িয়াই আনিলে।ৰাস্তাত বন্ধু-বান্ধৱ আৰু আত্মীয়ৰ সৈতে খেলা-ধূলা কৰি আছিল যুৱকজনে।
সেই সময়ত ৰাস্তাৰে পাৰ হৈ গৈ আছিল এজন বাইক আৰোহী। যুৱকজনে তেওঁৰ ফালে ৰং দলিয়াই দিয়ে। বাইক আৰোহীজনে গাড়ী ৰখাই নামি অহাত তেওঁৰ মুখতো ৰং লগাই দিয়া হয়। আৰু তাৰপিছত খঙতে তেওঁ বিবেক হেৰুৱাই পেলায়। অভিযোগ অনুসৰি, ইয়াৰ পিছতে তেওঁ বাইকৰ পৰা পেট্ৰ’ল (Petrol) লৈ বটলত ঢালি ৰং সানি দিয়া যুৱকজনৰ ওপৰত পেট্ৰ’ল ঢালি জুই লগাই দিয়ে।
চকুৰ সন্মুখত এনে ঘটনা দেখি যুৱকজনৰ বন্ধু-বান্ধৱী আৰু আত্মীয়সকল স্তম্ভিত হৈ পৰে। যুৱকজনক জুই লগাই পলায়ন কৰে বাইক আৰোহীজনে। ইফালে অগ্নিদগ্ধ যুৱকজনক উদ্ধাৰ কৰি স্থানীয় চিকিৎসালয়লৈ লৈ যোৱা হয়। চিকিৎসালয়ৰ সূত্ৰ অনুসৰি, যুৱকজনৰ হাত আৰু কান্ধ বেয়াকৈ জ্বলি গৈছে। তেওঁৰ অৱস্থা সংকটজনক।
আৰক্ষীৰ মতে, বাইক আৰোহীজনৰ বিৰুদ্ধে হত্যাৰ চেষ্টাৰ গোচৰ ৰুজু কৰা হৈছে। তেওঁৰ সন্ধান চলি আছে। মঙলবাৰে হায়দৰাবাদৰ (Hyderabad) মেদক জিলাৰ মাৰপল্লীত সংঘটিত হয় এই ঘটনা।
