বিহাৰৰ পিছত এইবাৰ ৰাজস্থান। নৰেন্দ্র মোদী চৰকাৰৰ ‘চুক্তিভিত্তিক অস্থায়ী সেনা’ নিয়োগৰ সিদ্ধান্তৰ প্রতিবাদত ক্রমশ বিক্ষোভ সৃষ্টি হৈছে ৰাজ্যই ৰাজ্যই। পৰিস্থিতি চম্ভালিবলৈ অগ্নিপথ প্রকল্পত নিয়োজিত ‘অগ্নিবীৰ’সকলৰ চাৰি বছৰৰ ম্যাদৰ শেষত নতুনকৈ চাকৰিৰ প্রতিশ্রুতি দিছে কেন্দ্রীয় গৃহ মন্ত্ৰালয় আৰু একাধিক বিজেপিশাসিত ৰাজ্যই।
অগ্নিপথ প্রকল্পৰ বিৰোধিতা কৰি বুধবাৰে বিহাৰৰ গয়া, পাটনা, বক্সাৰ, মুজফফ্ৰপুৰসহ বিভিন্ন স্থানত ভাৰতীয় সেনাত চাকৰি প্রার্থীসকলে ৰে’ললাইন অৱৰোধ কৰে।
ৰাজস্থানৰ ৰাজধানী জয়পুৰত বৃহস্পতিবাৰে অগ্নিপথ প্রকল্প বাতিলৰ দাবীত হয় বিক্ষোভ। হাৰিয়ানা, মহাৰাষ্ট্র আৰু উত্তৰ প্রদেশতো ক্ষোভৰ জুই উমি উমি জ্বলিছে। যিবোৰ ৰাজ্যৰ পৰা যুৱকসকলৰ সেনাত যোগদানৰ হাৰ বেছি, তাত আন্দোলনৰ সুৰ অধিক তীব্ৰ হ’ব পাৰে বুলি অনুমান কৰা হৈছে।
