চিচিটিভি ফুটেজত অযোধ্যাৰ ৰাম মন্দিৰৰ পৰা প্ৰণামী চুৰিৰ ১০৫টা ঘটনা দেখা গৈছে। ইতিমধ্যে প্ৰণামী চুৰিৰ লগত জড়িত সকলোকে চিনাক্ত কৰা হৈছে। এই কথা সোমবাৰে উত্তৰ প্ৰদেশ আৰক্ষীৰ বিশেষ তদন্তকাৰী দলে উচ্চতম ন্যায়ালয়ত জনায়। শীঘ্ৰে এই গোচৰৰ চাৰ্জশ্বীট দাখিল কৰা হ’ব বুলি জানিবলৈ দিয়ে ছলিচিটৰ জেনেৰেল তুষাৰ মেহতাই।
মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচি আৰু ন্যায়াধীশ ভি মোহনাৰ নেতৃত্বাধীন উচ্চতম ন্যায়ালয়ৰ বিচাৰপীঠে ৰাম মন্দিৰৰ পৰা প্ৰণামী চুৰিৰ সৈতে জড়িত গোচৰৰ শুনানি গ্ৰহণ কৰি আছে। সোমবাৰে মুখ্য ন্যায়াধীশৰ বিচাৰপীঠত মেহতাই কয় যে তদন্ত প্ৰায় সম্পূৰ্ণ হৈছে। লগতে তেওঁ কয় যে ২৫ ছেপ্টেম্বৰৰ ভিতৰত ৰাম মন্দিৰৰ পৰা প্ৰণামী চুৰি হোৱাৰ ক্ষেত্ৰত চাৰ্জশ্বীট দাখিল কৰা হ’ব। চলিচিটৰ জেনেৰেলে কয়, “প্ৰথম গ্ৰেপ্তাৰৰ তাৰিখৰ পৰা ৯০ দিনৰ সময়সীমা ২৫ ছেপ্টেম্বৰত শেষ হয়। যদি সেই সময়ৰ ভিতৰত চাৰ্জশ্বীট দাখিল কৰা নহয় তেন্তে অভিযুক্তই জামিন লাভ কৰিব পাৰে। আমি দুদিনৰ ভিতৰত (চাৰ্জশ্বীট) দাখিল কৰিম।”
মুখ্য ন্যায়াধীশৰ আদালতত এছ আই টিৰ তদন্তৰ প্ৰতিবেদনৰ কথা উল্লেখ কৰে ছলিচিটৰ জেনেৰেলে। এনডি টিভিৰ এক প্ৰতিবেদন অনুসৰি, এছ আই টিৰ প্ৰতিবেদনত উল্লেখ কৰা হৈছে যে অযোধ্যাৰ ৰাম মন্দিৰৰ চিচিটিভি কেমেৰাত ১০৫টা প্ৰণামী চুৰিৰ কাণ্ড ধৰা পৰিছে। তদন্তত এতিয়ালৈকে যিবোৰ বিষয় উত্থাপন হৈছে, প্ৰণামী চুৰি সন্দৰ্ভত কি প্ৰমাণ পোৱা গৈছে সেই বিষয়েও আদালতক অৱগত কৰা হয়। ষ্টেটাছ ৰিপ’ৰ্টত চিচিটিভিৰ ফুটেজ আৰু অন্যান্য প্ৰমাণ কেনেকৈ বিশ্লেষণ কৰি অভিযুক্তক চিনাক্ত কৰা হৈছে সেই বিষয়েও উল্লেখ কৰা হৈছে।
উল্লেখ্য যে ৰাম মন্দিৰৰ প্ৰণামী চুৰিৰ ঘটনা প্ৰথম পোহৰলৈ আহিছিল যোৱা ৭ জুনত। বিষয়টোক লৈ হুলস্থুল আৰম্ভ হোৱাত উত্তৰ প্ৰদেশৰ মুখ্যমন্ত্ৰী আদিত্যনাথে কয় যে এই ঘটনাৰ সম্পূৰ্ণ তদন্ত কৰা হ’ব। উত্তৰ প্ৰদেশ আৰক্ষীৰ বিশেষ তদন্তকাৰী দল গঠন কৰা হয়। পিছত ২০ জুলাইত মুখ্য ন্যায়াধীশ সূৰ্য কান্তৰ নেতৃত্বত এখন বিচাৰপীঠে বিশেষ তদন্তকাৰী দলটোৰ কিছু পৰিৱৰ্তনৰ পৰামৰ্শ আগবঢ়ায়। সেই অনুসৰি ২৬ জুলাইত লক্ষ্ণৌ ৰেঞ্জৰ মহাপৰিদৰ্শক কিৰণ এছক দলটোৰ মুৰব্বী হিচাপে নিযুক্তি দিয়া হয়। তেওঁৰ লগতে অযোধ্যাৰ ডিআইজি সোমেন বাৰ্মা আৰু এছএছপি গৌৰৱ গ্ৰ’ভাৰকো দলত নিযুক্তি দিয়া হৈছে।
