বিশেষ প্ৰতিবেদনঃ
ইউক্ৰেইনত আবদ্ধ হৈ আছে অসমৰ দুই শতাধিক ছাত্ৰ-ছাত্ৰী। দুইবছৰ পূৰ্বে মেডিকেল বিভাগত অধ্যয়নৰ বাবে ইউক্ৰেইনস্থিত টাৰ্ণপিল নেচনেল মেডিকেল কলেজলৈ যোৱা নগাঁৱৰ শিমলুগুৰিৰ ছাত্ৰী আলগৌছিয়া শ্বৱনম শেহতীয়াকৈ নিজ বাসগৃহত উপস্থিত হৈছেহি।
আতংকিত ছাত্ৰীগৰাকী সুকলমে ঘৰ আহি পোৱা বাবে ভগৱানক ধন্যবাদ জ্ঞাপন কৰে। ছাত্ৰীগৰাকীয়ে কয় যে, “আমি অহাৰ সময়ত ইউক্ৰেইনৰ পৰিস্থিতি ইমান বেয়া নাছিল যদিও আমি অহাৰ পাছত ঠাইখনৰ পৰিস্থিতি হঠাৎ অগ্নিগৰ্ভা হৈ পৰে। জানুৱাৰী মাহৰ শেহৰ পৰা তাৰ পৰিস্থিতি ক্ৰমাৎ বেয়া হৈ আহিছিল।”
তেওঁ আগলৈ কয় যে, “আমি যেন-তেন আহিলোঁ যদিও তাত এতিয়াও মোৰ বন্ধু-বান্ধৱী তাতেই আছে, পৰিস্থিতি ইমানেই বেয়া যে তাত খাবলৈ একো নাই। ভাৰতীয় দূতাবাসে সিঁহতক কৈছে পোলেণ্ড আৰু হাংগেৰী হৈ দেশলৈ ওভটি আহিবলৈ। কিন্তু সেইয়া সম্ভৱ নহয়, বাহিৰত বোমা বিস্ফোৰণ হৈ আছে।”
আনহাতে ,আলগৌছিয়া শ্বৱনৰ সহপাঠী তথা গুৱাহাটীৰ নুনমাটি নিবাসী অশোক সিনহাৰ লগত তেওঁৰ হোৱা ভিডিঅ’কলিঙত ছাত্ৰ জনে সাংবাদিকক কয় যে “আমাৰ ইয়াত অৱস্থা নাই। যাতায়ত বন্ধ,দোকান পোহাৰ বন্ধ,কেৱল বাংকাৰত সুমাই আছো। আমি তীব্ৰ খাদ্য সংকটত ভুগিছো। খোৱাৰ সামগ্ৰীটো নাই আনকি খোৱা পানীৰো অভাৱ।”
