অৱশেষত সন্ধান ওলাইছে ডিমা হাছাও জিলাৰ পৰা সন্ধানহীন (Dima Hasao Missing person) হৈ থকা বনকৰ্মীৰ দলৰ। জিলাখনৰ মাইবাঙৰ পৰা নাগালেণ্ড সীমান্তৰে এক অভিযানত লাংটিঙলৈ গৈছিল ২৬ জনীয়া বন বিভাগৰ দলটো। কিন্তু হঠাৎ যোগাযোগ বিচ্ছিন্ন হৈ পৰে দলটো। অৱশেষত লাংটিঙৰ সমীপৱৰ্তী অঞ্চলত দলটোৰ সন্ধান পোৱা বুলি জানিব পৰা গৈছে।
প্ৰাপ্ত তথ্য অনুসৰি, বন বিভাগৰ বিষয়া-কৰ্মচাৰীৰ দলটো মাইবাঙৰ পৰা খেপ্ৰে হৈ লাংটিঙলৈ উভতি অহাৰ কথা আছিল যদিও নিৰ্ধাৰিত সময়ত উপস্থিত হোৱা নাছিল। লগতে তেওঁলোকৰ সৈতে যোগাযোগ বিচ্ছিন্ন হৈ পৰাত পৰিয়াল তথা বন বিভাগ আৰু জিলা প্ৰশাসনৰ মাজত গভীৰ উদ্বেগৰ সৃষ্টি হয়।
আনহাতে, দলটোৰ সন্ধান উলিয়াব নোৱৰাত দেওবাৰে জিলাখনত ব্যাপক চাঞ্চল্যৰ সৃষ্টি হয়। ইফালে বেয়া বতৰৰ লগতে পাহাৰীয়া দুৰ্গম পথ আৰু অঞ্চলত ধাৰাবাহিকভাৱে হৈ থকা বৰষুণৰ বাবে দলটোৰ সুৰক্ষাক লৈয়ো আশংকা বৃদ্ধি পায়।
অৱশেষত সকলো অনিশ্চয়তাৰ অন্ত পেলাই লাংটিঙৰ ওচৰত দলটোৰ সন্ধান যায়। অৱশ্যে দলটোৰ সদস্যসকল সুস্থ শৰীৰে আছেনে নাই সেয়া বন বিভাগ তথা প্ৰশাসনৰ পৰা এতিয়াও জানিব পৰা হোৱা নাই। উল্লেখযোগ্য যে ২৬ জনীয়া দলটোত দুগৰাকী ৰেঞ্জাৰ, এগৰাকী সহকাৰী ৰেঞ্জাৰ আৰু ২০ জন ফৰেষ্টাৰ আৰু ফৰেষ্ট গাৰ্ড আছিল। ইয়াৰ উপৰি স্থানীয় তিনি গৰাকী লোক গাইড হিচাপে তেওঁলোকৰ লগত আছিল।
