ডিমা হাছাও জিলাৰ উমৰাংছ’ৰ গলফ ফিল্ডস্থিত নৱনিৰ্মিত এচিএ ক্ৰিকেট ষ্টেডিয়ামৰ ফ্লাড লাইট ব্যৱস্থা দেওবাৰে আনুষ্ঠানিকভাৱে মুকলি কৰে চিইএম দেৱলাল গাৰলোছাই৷ অনুষ্ঠানত উপস্থিত থাকে বিচিচিআইৰ সচিব দেৱজিৎ শইকীয়াসহ দিমা হাছাও স্বায়ত্তশাসিত পৰিষদৰ একাংশ ইএম, এমএচিৰ লগতে ক্ৰিকেট সংস্থাৰ শীৰ্ষ বিষয়াসকল।
অনুষ্ঠানত উপস্থিত থাকি চিইএম দেৱলাল গাৰলোছাই কয় যে ডিমা হাছাও জিলাৰ ক্ৰীড়া আন্তঃগাঁথনি উন্নয়নৰ ক্ষেত্ৰত ডঃ হিমন্ত বিশ্ব শৰ্মা চৰকাৰৰ যথেষ্ট অৱদান আছে।
উল্লেখযোগ্য যে এই উদ্বোধনী অনুষ্ঠানৰ লগত সংগতি ৰাখি চিইএম একাদশ আৰু সচিব একাদশৰ মাজত চেংজা তুলাৰাম ট্ৰফি ২০২৬ বৰ্ষৰ দ্বিতীয় ৰাউণ্ডৰ ক্ৰিকেট মেচ অনূষ্টিত হয়৷
আনহাতে, বিচিচিআইৰ সচিব দেৱজিৎ শইকীয়া কয় যে চৰকাৰে দিমা হাছাও জিলাৰ যুৱক-যুৱতীসকলক খেলৰ প্ৰতি আকৰ্ষিত কৰিবলৈ আন্তঃগাঁথনিৰ লগতে বিভিন্ন সুবিধা প্ৰদান কৰিছে৷ অসম ক্ৰিকেট সংস্থাই অনাগত দিনত ক্ৰিকেটৰ প্ৰতি অধিক গুৰুত্ব দিব আৰু উমৰাংছ’ত প্ৰশিক্ষণ শিবিৰৰ সুবিধাও প্ৰদান কৰা হ’ব বুলি কয়।
