[captainform id=”1286858″ lightbox=”1″ miliseconds=”3000″ type=”auto-popup”]
ASSAM TIMES POST
নগাঁওঃ নগাঁৱৰ বেচৰকাৰী খণ্ডৰ অগ্ৰণী শিক্ষানুষ্ঠান ৰামানুজন কনিষ্ঠ মহাবিদ্যালয়ৰ নৱাগত আদৰণি সভা মঙলবাৰে অনুষ্ঠিত হয়। ইয়াৰ লগতে অনুষ্ঠিত হয় স্বৰ্গীয় ফুলাই বৰা সোঁৱৰণী বঁটা প্ৰদান অনুষ্ঠান। এই উপলক্ষে কনিষ্ঠ মহাবিদ্যালয়খনৰ অধ্যক্ষ দিলীপ বৰাৰ সভাপতিত্বত নগাঁও চহৰৰ খগেন মহন্ত প্ৰেক্ষাগৃহত অনুষ্ঠিত সভাত বিশিষ্ট অতিথি হিচাপে অংশগ্ৰহণ কৰি সাহিত্যিক, সমালোচক ইছমাইল হুছেইনে মহাবিদ্যালয়খনৰ ছাত্ৰ-ছাত্ৰীসকলৰ চমকপদ সফলতাৰ শলাগ লৈ কয় যে ছাত্ৰ-ছাত্ৰীসকল দেশৰ ধৰণী আৰু জাতিৰ সপোন।
জীৱনৰ খলা-বমা পথ অতিক্ৰম কৰি তেওঁলোকে সমাজ আৰু দেশক গঢ় দিব লাগিব। তেওঁ ছাত্ৰ-ছাত্ৰী সকলক ভৱিষ্যতে সমাজৰ শিক্ষক হ’বলৈ আহ্বান জনায়। ভাষণ প্ৰসংগত হুছেইনে নিজৰ শিপাৰ লগত সদায় দৃঢ়ভাৱে সংলগ্ন হ’বলৈ ছাত্ৰ-ছাত্ৰীসকলক আহ্বান জনাই লগতে কয় যে নিজৰ ঐতিহ্য, সমাজ-সংস্কৃতিৰ বিষয়ে জনা ছাত্ৰ-ছাত্ৰীহে সমাজৰ ধৰণী হ’ব পাৰে। কেৱল মেধা হ’লেই নহ’ব। সমাজখনক জানিব লাগিব।
ছাত্ৰ-ছাত্ৰীসকলৰ ভৱিষ্যত কাৰ্যপন্থা মানৱীয় হোৱা দৰকাৰ। সভাত আন এগৰাকী বিশিষ্ট অতিথি লোক-সংস্কৃতিৰ গৱেষক তথা শিক্ষাবিদ ডঃ অনিল শইকীয়াই বিজ্ঞানৰ উত্তৰণৰ বিভিন্ন স্তৰ সম্পৰ্কে ব্যাখ্যা দাঙি ধৰি কয় যে সৰু-সৰু চিন্তাৰে কেতিয়াবা একোটা মহৎ কাৰ্য সম্পন্ন হ’ব পাৰে। তেওঁ আৰু কয় যে আমাৰ অস্তিত্ব আমাৰ সৃষ্টিৰ ওপৰত নিৰ্ভৰ কৰে। সেয়ে বিজ্ঞান, সাহিত্য, কলা, খেলা-ধূলা আদি সকলো দিশতে ছাত্ৰ-ছাত্ৰীসকল আগবাঢ়ি গ’লে অসমখনৰ উন্নতি হ’ব।
সভাত বক্তা হিচাপে ডাঃ অঞ্জনজ্যোতি চৌধুৰীয়ে নিজৰ স্বভাৱ-সুলভ ৰসাল ভাষণৰে ছাত্ৰ-ছাত্ৰীসকলক আমোদ দি লগতে কয় যে ৰামানুজন কনিষ্ঠ মহাবিদ্যালয় কেৱল ছাত্ৰ-ছাত্ৰীক শিক্ষা দিয়া প্ৰতিষ্ঠান নহয়। এইখন ভাল মানুহ গঢ় দিয়াৰ কৰ্মশালা। সাধনা অবিহনে সাফল্যৰ চমু বাট নাই বুলিও তেওঁ মন্তব্য কৰে। এই সভাতে চলিত বৰ্ষৰ উচ্চতৰ মাধ্যমিক চূড়ান্ত পৰীক্ষাত শীৰ্ষ স্থান দখল কৰা আৰু বিভিন্ন বিষয়ত ৰাজ্যৰ ভিতৰত সৰ্বাধিক নম্বৰ লাভ কৰা কনিষ্ঠ মহাবিদ্যালয়খনৰ ছাত্ৰ-ছাত্ৰীসকলক ফুলাই বৰা সোঁৱৰণী বঁটা প্ৰদান কৰা হয়। কনিষ্ঠ মহাবিদ্যালয়খনৰ অধ্যাপক ৰাতুল কুমাৰ নাথে উদ্দেশ্য ব্যাখ্যা কৰা আৰু উপাধ্যক্ষা সংগীতা বৰুৱা বৰাই আদৰণি ভাষণ প্ৰদান কৰা সভাখনত বিশিষ্ট গল্পকাৰ শিৱানন্দ কাকতি, কবি প্ৰয়াগ শইকীয়া, লাৱণ্য বৰা, প্ৰদীপ বৰুৱা প্ৰমুখ্যে ভালেসংখ্যক বিশিষ্ট ব্যক্তি উপস্থিত থাকে। এই সভাতে কৰুণাধাৰালৈ ৰামানুজন কনিষ্ঠ মহাবিদ্যালয়ৰ তৰফৰ পৰা ৩০ হাজাৰ টকা আগবঢ়োৱা হয়।
ইয়াৰ পূৰ্বে পুৱা ৰামানুজন কনিষ্ঠ মহাবিদ্যালয়ৰ চৌহদত পতাকা উত্তোলন কৰে অধ্যক্ষ দিলীপ বৰাই আৰু স্মৃতি তৰ্পণ কৰে পৰিচালনা সমিতিৰ সভাপতি বিপুল বৰাই। ইয়াৰ পাছতেই ‘সৃষ্টি’ আৰু ‘সিৰলু’ নামৰ দুখন প্ৰাচীৰ পত্ৰিকা উন্মোচন কৰে গল্পকাৰ শিৱানন্দ কাকতি আৰু সাহিত্যিক আভা বৰাই। ইফালে বিয়লি সাংস্কৃতিক অনুষ্ঠান অনুষ্ঠিত হয়।
