[captainform id=”1286858″ lightbox=”1″ miliseconds=”3000″ type=”auto-popup”]
ASSAM TIMES POST
উৎপল দাস, গোলাঘাটঃ উঠি অহা প্ৰজন্মৰ মাজত মাৰাত্মক ব্যাধি হিচাপে গা কৰি উঠিছে নিষিদ্ধ ড্ৰাগছৰ ব্যৱহাৰ। ড্ৰাগছৰ কবলত পৰি নষ্ট হৈ গৈছে একো একোটা জীৱন, একো একোটা পৰিয়ালৰ লগতে ইয়াৰ কুপ্ৰভাৱ সমগ্ৰ সমাজখনতে পৰা দেখা গৈছে।
এনে প্ৰেক্ষাপটত উঠি অহা প্ৰজন্মৰ মাজত এই বৰবিহ ড্ৰাগছৰ ভয়াবহতা আৰু ইয়াৰ ব্যৱহাৰ বন্ধ কৰাৰ ক্ষেত্ৰত সজাগতা সৃষ্টিৰ উদ্দেশ্যে আজি গোলাঘাটৰ ৰিলায়েন্স কনিষ্ঠ মহাবিদ্যালয়ত এখন এদিনীয়া কৰ্মশালা তথা সজাগতা সভাৰ আয়োজন কৰা হয়।
কৃপা ফাউণ্ডেচনৰ উদ্যোগত আৰু ৰিলায়েন্স কনিষ্ঠ মহাবিদ্যালয়ৰ সহযোগত অনুষ্ঠিত কৰা এই কৰ্মশালাখনিত সভাপতিত্ব কৰে ৰেক্টৰ ড° তোলেন্দ্ৰনাথ হাজৰিকাই। অনুষ্ঠানত গোলাঘাট জিলা আবকাৰী উপ অধীক্ষক মহেশ্বৰ দাস, আবকাৰী পৰিদৰ্শক বিভু ফুকন, ৰাজ্যিক নিচাযুক্ত আৰু মাদকদ্ৰব্য নিবাৰণী পৰিষদ গোলাঘাট জিলা সমিতিৰ বিষয়ববীয়া বেণী গোৱালা, এনইটিএছইউৰ প্ৰগ্ৰেম অফিচাৰ অৰূপ সন্দিকৈ, গোলাঘাট পৌৰসভাৰ পৌৰপতি জুৰি দাস ৰাজখোৱা, ৰিলায়েন্স কনিষ্ঠ মহাবিদ্যালয়ৰ অধ্যক্ষ হেমন্ত কুমাৰ বৰা, প্ৰবক্তা আনমনা গগৈ আদি উপস্থিত থাকি ছাত্ৰ ছাত্ৰী সকলক ড্ৰাগছৰ অপকাৰিতা আৰু ভয়াবহতাৰ বিষয়ে বক্তব্য আগবঢ়ায়।
