[captainform id=”1286858″ lightbox=”1″ miliseconds=”3000″ type=”auto-popup”]
ASSAM TIMES POST
অজন্তা তালুকদাৰ, বোকাখাতঃ ৰাষ্ট্ৰপতি পুৰস্কাৰপ্ৰাপ্ত বোকাখাতৰ নামদৈয়াং নিম্ন প্ৰাথমিক বিদ্যালয়ৰ অৱসৰপ্ৰাপ্ত কৃতি শিক্ষয়িত্ৰী সোনমাই শইকীয়াৰ আজি নিজা বাসভৱনত পুৱা ৮০ বছৰ বয়সত বাৰ্দ্ধক্যজনিত কাৰণত মৃত্যু হয়। ১৯৩৯ চনৰ ১ ফেব্ৰুৱাৰীত যোৰহাট চাৰিগাঁও ভৰালী চুক গাঁৱত জন্ম লাভ কৰা কৃতি শিক্ষয়িত্ৰী জনপ্ৰিয় আৰু সৰবৰহী মহিলা সোনমাই শইকীয়াই প্ৰাথমিক, মাধ্যমিক আৰু উচ্চ শিক্ষা যোৰহাটতেই সমাপ্ত কৰাৰ পাছত ১৯৬৬ চনত যোৰহাটৰ ১৮ নং কাঠনিয়াৰকুৰি প্ৰাথমিক বিদ্যালয়ত সহ-শিক্ষয়িত্ৰী হিচাপে চাকৰি জীৱনৰ পাতনি মেলে ৷
সোনমাই শইকীয়াই ১৯৬৮ চনত বোকাখাত ম’হমাইকী গাঁৱৰ বিদ্যাধৰ শইকীয়াৰ লগত বিবাহ পাশত আবদ্ধ ৷ সেই সূত্ৰেই চাকৰিও বদলি কৰি বোকাখাতৰ নামদৈয়াং নিম্ন বুনিয়াদী প্ৰাথমিক বিদ্যালয়ত সহ-শিক্ষয়িত্ৰী হিচাপে যোগদান কৰে ৷ পৰিয়াল পৰিচালনা আৰু এগৰাকী কৃতী শিক্ষয়িত্ৰী হিচাপে নিজৰ দায়িত্ব পালন কৰাৰ মাজতে সোনমাই শইকীয়াই শিৱপ্ৰসাদ হৰিপ্ৰসাদ, লক্ষীপ্ৰসাদ, কামাখ্যাপ্ৰসাদ আৰু অনন্তপ্ৰসাদ শইকীয়া নামেৰে পাঁচটি পুত্ৰ সন্তান জন্ম দিয়াৰ লগতে সন্তান কেইটিকো সু-শিক্ষিত কৰাৰ দায়িত্ব চম্ভালে ৷
ইয়াৰ মাজতেই নিজৰ একাগ্ৰতা আৰু অধ্যাৱসায়ৰ ফলত সোনমাই শইকীয়া সহ-শিক্ষয়িত্ৰীৰ পৰা বিদ্যালয়ৰ প্ৰধান শিক্ষয়িত্ৰী পদলৈ উন্নীত হয় ৷ শিক্ষকতাৰ বাবে কেইবাৰো জিলা পৰ্যায়ত কৃতী শিক্ষকৰ সন্মান লাভ কৰাৰ উপৰিও ৰাজ্যিক পৰ্যায়তো সন্মান লাভ কৰে ৷ ৰাষ্ট্ৰীয় পৰ্যায়তো কৃতী শিক্ষয়িত্ৰী হিচাপে ১৯৯৩ চনত তেতিয়াৰ ৰাষ্ট্ৰপতি শংকৰ দয়াল শৰ্মাৰ পৰা ৰাষ্ট্ৰপতি বঁটা গ্ৰহণ কৰিছিল সোনমাই শইকীয়াই ৷ শিক্ষকতাৰ মাজতে সোনমাই শইকীয়া সামাজিকভাৱেও কেইবাটাও ৰাজহুৱা সংগঠনৰ লগত জড়িত আছিল ৷
বোকাখাত পুৱতি সাহিত্য সভা, সন্ধানী লেখিকা সমাৰোহ সমিতি, বোকাখাত কেন্দ্ৰীয় মহিলা সমিতি আদিৰ দৰে বহু সংগঠনৰ নেতৃত্ব বহন কৰিছিল ৷ প্ৰধান শিক্ষয়িত্ৰী হিচাপে ১৯৯৮ চনত নামদৈয়াং নিম্ন বুনিয়াদী প্ৰাথমিক বিদ্যালয়ৰ পৰা অৱসৰ গ্ৰহণ কৰে কৃতী শিক্ষয়িত্ৰী সোনমাই শইকীয়াই ৷ অৱসৰৰ পাছতেই সোনমাই শইকীয়া সক্ৰিয় ৰাজনীতিত প্ৰৱেশ কৰে ৷
কংগ্ৰেছ দলৰ প্ৰাৰ্থী হৈ ২০০৪ চনত অনুষ্ঠিত পঞ্চায়ত নিৰ্বাচনত জিলা পৰিষদৰ সদস্যা হিচাপে প্ৰতিদ্বন্দ্বিতা কৰি বোকাখাত জিলা পৰিষদৰ পৰা নিৰ্বাচিত হৈ ৰাইজৰ সেৱাত নিজকে মনোনিৱেশ কৰে ৷ আজি পুৱা ৮-১৫ বজাত সোনমাই শইকীয়াৰ মৃত্যুৰ বাতৰি বিয়পি পৰাৰ লগে লগে অনেক গুণমুগ্ধ আহি ভিৰ কৰা পৰিলক্ষিত হয় ৷ তেওঁৰ বাসগৃহতেই বোকাখাতৰ প্ৰাক্তন বিধায়ক অৰুণ ফুকন, বোকাখাত মহকুমা কবি সন্মিলন, বোকাখাত সাংস্কৃতিক মহাসভা, বোকাখাত জিলা মইনা পাৰিজাত, অসম জাতীয়তাবাদী যুৱ-ছাত্ৰ পৰিষদ, বোকাখাত জিলা সমিতি, বোকাখাত বিদ্যুৎ পৰিষদ পেঞ্চনাৰ সন্থা, পুৱতি সাহিত্য সভা আদি সংগঠনে শেষ শ্ৰদ্ধা জনায় ৷
ইয়াৰ পাছতেই প্ৰথমে সোনমাই শইকীয়াৰ মৃতদেহ তেওঁ শিক্ষকতা কৰা নামদৈয়াং নিম্ন বুনিয়াদী প্ৰাথমিক বিদ্যালয়লৈ নিয়া হয় ৷ বিদ্যালয় কৰ্তৃপক্ষৰ লগতে মুঙ্গীলাল কৃষ্ণাদেৱী বালিকা প্ৰাথমিক বিদ্যালয় কৰ্তৃপক্ষ, বোকাখাত কেন্দ্ৰীয় বিদ্যালয় কৰ্তৃপক্ষ, বোকাখাত উচ্চতৰ মাধ্যমিক বিদ্যালয় কৰ্তৃপক্ষ, বোকাখাত সন্ধানী লেখিকা সমাৰোহ সমিতি আদিয়ে শেষ শ্ৰদ্ধা জ্ঞাপন কৰে ৷
পৰৱৰ্তী সময়ত সোনমাই শইকীয়াৰ মৃতদেহ বোকাখাত কংগ্ৰেছৰ গান্ধী ভৱনলৈ অনা হয় ৷ গান্ধী ভৱনত বোকাখাত ব্লক কংগ্ৰেছ কমিটি, বোকাখাত মহিলা কংগ্ৰেছ কমিটি, চাহ মজদুৰ সংঘ, বোকাখাত শাখা, যুৱ কংগ্ৰেছ, এন এছ ইউ আই, আদিয়ে শেষ শ্ৰদ্ধা জ্ঞাপন কৰে ৷ সোনমাই শইকীয়াৰ মৃত্যুত বোকাখাতৰ লগতে সমগ্ৰ অঞ্চলতে গভীৰ শোকৰ ছাঁ পৰিছে ৷
