বাংলাদেশ (Bangladesh)ৰ আন্তঃৰাষ্ট্ৰীয় অপৰাধ ন্যায়াধিকৰণে (আইচিটি) ঢাকা (Dhaka)ৰ এজন প্ৰাক্তন আৰক্ষী প্ৰধানক (former police chief) মৃত্যুদণ্ড প্ৰদান (Capital punishment) কৰিছে। ঢাকা মেট্ৰ’পলিটান পুলিচ (ডিএমপি)ৰ প্ৰাক্তন আয়ুক্ত হাবিবুৰ ৰহমান (Habibur Rahman)ক সোমবাৰে মৃত্যুদণ্ড দিয়া হয়। ২০২৪ চনৰ জুলাই-আগষ্টত বাংলাদেশত ছাত্ৰ প্ৰতিবাদ চলি থকাৰ সময়ত তেওঁ ঢাকাৰ আৰক্ষী প্ৰধান আছিল। একে সময়তে ন্যায়াধিকৰণে ঢাকাৰ আন দুজন প্ৰাক্তন আৰক্ষী বিষয়াকো মৃত্যুদণ্ড প্ৰদান কৰে। আদালতে তিনিজন ব্যক্তিৰ সম্পত্তি বাজেয়াপ্ত কৰিবলৈও নিৰ্দেশ দিয়ে। ঢাকাৰ একেখন ন্যায়াধীকৰণে শেহতীয়াকৈ বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক মৃত্যুদণ্ড প্ৰদান কৰিছে। ২০২৪ চনৰ ৫ আগষ্টত ছাত্ৰ আন্দোলনৰ বাবে বাংলাদেশত হাছিনাৰ চৰকাৰ পতন হৈছিল।
হাছিনাই বাংলাদেশ এৰি ভাৰতত অস্থায়ী আশ্ৰয় লয়। আন্দোলনৰ সময়ত বাংলাদেশত আৰক্ষীৰ দমনৰ কেইবাটাও অভিযোগ উত্থাপিত হৈছিল। অন্তৱৰ্তীকালীন চৰকাৰৰ সময়ত এই অভিযোগবোৰৰ ওপৰত এক তদন্ত আৰম্ভ কৰা হয়। হাছিনাকো তদন্তৰ আওতালৈ অনা হয়। বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণে ইতিমধ্যে এই গোচৰত হাছিনাক মৃত্যুদণ্ড প্ৰদান কৰিছে। এইবাৰ দ্বিতীয় গোচৰত ঢাকা ন্যায়াধিকৰণে শাস্তি ঘোষণা কৰে। ২০২৪ চনৰ ৫ আগষ্টত ঢাকাৰ চানখাৰপুল অঞ্চলত আৰক্ষীৰ গুলীচালনাত ছয়জন লোকৰ মৃত্যু হৈছিল। এই ঘটনাৰ সন্দৰ্ভত ঢাকাৰ তদানীন্তন আৰক্ষী আয়ুক্তকে ধৰি আঠজন লোকৰ বিৰুদ্ধে গোচৰ ৰুজু কৰা হৈছিল। হাবিবুৰৰ উপৰি প্ৰাক্তন যুটীয়া আয়ুক্ত সুদীপ কুমাৰ চক্ৰৱৰ্তী, ৰমনা মণ্ডলৰ প্ৰাক্তন অতিৰিক্ত উপায়ুক্ত শ্বাহ আলম মহম্মদ আখতাৰুল ইছলাম আৰু প্ৰাক্তন সহকাৰী আয়ুক্ত মহম্মদ ইমৰুলো তালিকাত আছে। অৱশ্যে বাংলাদেশে চাৰিওজনকে ‘পলাতক’ বুলি ঘোষণা কৰিছে৷ সোমবাৰে ন্যায়াধিকৰণে হাবিবুৰ ৰহমান আৰু সুদীপ আৰু আখতাৰুলক মৃত্যুদণ্ড প্ৰদান কৰে। তিনিজন প্ৰাক্তন আৰক্ষী বিষয়াৰ সম্পত্তি বাজেয়াপ্ত কৰিবলৈও নিৰ্দেশ দিছে। ন্যায়াধীকৰণে ইমৰুলক ছবছৰৰ কাৰাদণ্ডৰ শাস্তি দিছিল। শ্বাহবাগ আৰক্ষী চকীৰ এজন পৰিদৰ্শক আৰু তিনিজন কনিষ্টবলক ঘটনাটোৰ সৈতে জড়িত থকাৰ অভিযোগত গ্ৰেপ্তাৰ কৰা হৈছে। বাংলাদেশ ন্যায়াধিকৰণে তেওঁলোকৰ চাৰিজনকে তিনি বছৰৰ কাৰাদণ্ডৰ শাস্তি প্ৰদান কৰিছিল।
