সমাগত বিধানসভা নিৰ্বাচন (Assam Legislative Assembly election)। বিধানসভা নিৰ্বাচনৰ পূৰ্বে শাসক-বিৰোধী উভয়ে নিৰ্বাচনৰ বাবে চলাইছে ব্যাপক প্ৰস্তুতি। কাৰ মাজতে ৰাজ্যত চলি থকা ভোটাৰ তালিকাৰ বিশেষ পুনৰীক্ষণক লৈ সৰৱ হৈ পৰিছে বিৰোধী দলসমূহ। কংগ্ৰেছ, ৰাইজৰ দল, অসম জাতীয় পৰিষদকে ধৰি বিৰোধী দলসমূহে অভিযোগ উত্থাপন কৰি আহিছে যে অসমত চলি থকা এছ আৰৰ জৰিয়তে বহি থলুৱা ভোটাৰৰ নাম ভোটাৰ তালিকাৰ পৰা কৰ্তন কৰাৰ বিপৰীতে হাজাৰ হাজাৰ বহিৰাগত ভোটাৰৰ সন্নিৱিষ্ট (Inclusion of external voters) কৰিবলৈ বিজেপিয়ে ষড়যন্ত্ৰ (BJP’s conspiracy) কৰিছে।
ইয়াত সহযোগিতা কৰিছে ৰাজ্যিক নিৰ্বাচন আয়োগে (State Election Commission)। ইয়াৰ মাজতে কিছুদিন পূৰ্বে ৰাইজৰ দলৰ সভাপতি অখিল গগৈ (Akhil Gogoi)য়ে অভিযোগ কৰিছিল যে ভিডিঅ’ কনফাৰেন্সযোগে বিজেপিৰ ৰাজ্যিক সভাপতি দিলীপ শইকীয়া (Dilip Saikia)ই বি এল এসকলক বিজেপিক ভোট নিদিয়া ভোটাৰৰ নাম কৰ্তন কৰিবলৈ নিৰ্দেশ দিছিল। এই কামৰ দায়িত্ব মন্ত্ৰী অশোক সিংহলক প্ৰদান কৰা বুলিও অখিল গগৈয়ে দাবী কৰিছিল।
ইয়াৰ পিছতে শাসক-বিৰোধীৰ বাদানুবাদ তুংগত উঠে। এইবাৰ বিজেপিয়ে ভোট চুৰিৰ ষড়যন্ত্ৰ কৰাৰ অভিযোগ তুলি ৰাজ্যিক বিজেপিৰ সভাপতি দিলীপ শইকীয়াৰ বিৰুদ্ধে বিৰোধী দলবোৰে গোচৰ তৰে। লগতে মুখ্যমন্ত্ৰীক সাঙুৰি নিৰ্বাচন আয়োগক এক স্মাৰক-পত্ৰও প্ৰদান কৰে। প্ৰায় ৬০ টা বিধানসভা সমষ্টিত ভোটাৰ তালিকাৰ পৰা ভোটাৰৰ নাম কৰ্তনৰ ষড়যন্ত্ৰ কৰাৰ অভিযোগ উত্থাপন কৰি শুকুৰবাৰে দিলীপ শইকীয়াৰ বিৰুদ্ধে দিছপুৰ আৰক্ষী থানাত বিৰোধী ঐক্যমঞ্চই এজাহাৰ দাখিল কৰে।
এই সন্দৰ্ভত কংগ্ৰেছ নেতা তথা প্ৰাক্তন সাংসদ ৰিপুণ বৰাই কয় যে সকলো বিৰোধী দলে ঐক্যবদ্ধভাৱে বিজেপিৰ ৰাজ্যিক সভাপতি দিলীপ শইকীয়াৰ বিৰুদ্ধে নিৰ্বাচন আয়োগৰ আইন অমান্য কৰা, জনতাক প্ৰতিনিধিত্ব কৰা আইন ভংগ কৰা, আৰক্ষীক তেওঁৰ বিৰুদ্ধে ব্যৱস্থা গ্ৰহণ কৰিবৰ বাবে দিছপুৰ থানাত এজাহাৰ দাখিল কৰা হৈছে।
