গুৱাহাটীৰ ফাঁচীবজাৰত (Fancybazar fire) শুকুৰবাৰে সংঘটিত হয় এক বিধ্বংসী অগ্নিকাণ্ড। ফাঁচীবজাৰৰ এছ এছ ৰোডৰ চাইবাৰ মাৰ্টত পুৱতি নিশা সংঘটিত এই অগ্নিকাণ্ডত এজনৰ মৃত্যু হোৱাৰ লগতে আম তিনিজন আহত হয়। জানিব পৰা মতে তেওঁলোকৰ অৱস্থা সংকটজনক।
মাৰ্কেটখনৰ গ্ৰাউণ্ড ফ্ল’ৰত সংঘটিত অগ্নিকাণ্ডত ভিতৰত থকা ৬০ খনতকৈয়ো অধিক কাপোৰৰ দোকান ঘতিগ্ৰস্ত হয়। এই ঘটনাত মাৰ্কেটখনৰ ভিতৰত থকা মহম্মদ চাদেৰ নামৰ লোকজনৰ মৃত্যু হয়। মাৰ্কেটখনৰ ভিতৰত থকা চাৰিজন লোক অগ্নিকাণ্ডৰ ফলত আবদ্ধ হৈ পৰে।
তেওঁলোকক উদ্ধাৰ কৰি সংকটজনক অৱস্থাত জি এম চি এইচলৈ প্ৰেৰণ কৰে যদিও মহম্মদ চাদেৰৰ মৃত্যু হয়। আনহাতে, তাচিব, চাহিন, আৰিফ নামৰ আন তিনিজন লোক বৰ্তমান সংকটজনক অৱস্থাত চিকিৎসাধীন হৈ আছে। অগ্নিনিৰ্বাপক বাহিনীৰ ১৩ খন বাহনে জুই নিৰ্বাপনৰ চেষ্টা কৰে।
অগ্নিনিৰ্বাক বাহিনীৰ লোকে জনোৱা মতে, চাইবাৰ মাৰ্টত অগ্নিকাণ্ডৰ ঘটনাৰ খবৰ পুৱা ৪.২০ বজাত লাভ কৰাৰ লগে লগে কেইবাটাও ষ্টেচনৰ পৰা ১৩ খনকৈ অগ্নিনিৰ্বাপণ বাহন ঘটনাথলীত উপস্থিত হৈ জুই নুমুৱাবলৈ চেষ্টা কৰে। অৱশ্যে এই অগ্নিকাণ্ডৰ কাৰণ সন্দৰ্ভত এতিয়ালৈকে জানিব পৰা হোৱা নাই। প্ৰাৰম্ভিকভাৱে শ্বৰ্ট চাৰ্কিটৰ ফলত অগ্নিকাণ্ডৰ সূত্ৰপাত হোৱাৰ সন্দেহ কৰা হৈছে।
