মহানগৰীৰ গণেশগুৰিস্থিত (Ganeshguri) এখন হোটেলত এগৰাকী ১৫ বছৰীয়া কিশোৰীক আবদ্ধ কৰি যৌন নিৰ্যাতন (Sexual assault) চলোৱাৰ গুৰুতৰ অভিযোগ উত্থাপন হৈছে।
ভুক্তভোগীৰ পৰিয়ালৰ অভিযোগ অনুসৰি, চিনাকিৰ সুযোগ লৈ ফিৰোজ হুছেইন ওৰফে ‘বৰো’ নামৰ এজন যুৱকে কাপোৰ কিনি দিয়াৰ কথা কৈ ষষ্ঠ শ্ৰেণীত অধ্যয়নৰত কিশোৰীগৰাকীক ঘৰৰ পৰা ফুচুলাই লৈ যায়। পৰৱৰ্তী সময়ত কিশোৰীগৰাকীক গণেশগুৰিৰ এখন হোটেললৈ নি ওৰে নিশা আবদ্ধ কৰি ৰখাৰ অভিযোগ উঠিছে।
অভিযুক্ত যুৱকজনে এজন বন্ধুৰ সহযোগত কিশোৰীগৰাকীক ৰচীৰে বান্ধি শাৰীৰিক আৰু যৌন নিৰ্যাতন চলোৱাৰো অভিযোগ কৰিছে পৰিয়ালে।
ঘটনা সন্দৰ্ভত ভুক্তভোগীৰ পৰিয়ালে গীতানগৰ আৰক্ষী থানাত এজাহাৰ দাখিল কৰিছে। আৰক্ষীয়ে অভিযোগৰ ভিত্তিত তদন্ত আৰম্ভ কৰাৰ লগতে অভিযুক্তসকলৰ সন্ধানত অভিযান চলোৱাৰ তথ্য পোৱা গৈছে।
অভিযোগসমূহ আৰক্ষীৰ তদন্ত আৰু ন্যায়িক প্ৰক্ৰিয়াত প্ৰমাণিত হ’বলৈ বাকী আছে। কিশোৰীগৰাকীৰ পৰিচয় আইনী কাৰণত গোপন ৰখা হৈছে।
