‘অপাৰেচন সিন্দুৰ’ৰ (Operation Sindoor) লগে লগে পাকিস্তানে জম্মু-কাশ্মীৰৰ চাম্বা ছেক্টৰৰ জৰিয়তে ভাৰতত ৫০টা সন্ত্ৰাসবাদীক অনুপ্ৰৱেশ কৰাবলৈ চেষ্টা কৰে। সংবাদ সংস্থা এএনআইৰ ওচৰত এই দাবী কৰিছে বিএছএফৰ এজন বিষয়াই।
উল্লেখ্য যে ভাৰতে ৭ মে’ত পাকিস্তানৰ মাটিত ‘অপাৰেচন সিন্দুৰ’ আৰম্ভ কৰিছিল। পিছদিনা অৰ্থাৎ ৮ মে’ত পাকিস্তানে চাম্বা ছেক্টৰৰ জৰিয়তে ৪০-৫০ জন সন্ত্ৰাসবাদীক ভাৰতলৈ সৰবৰাহ কৰিবলৈ চেষ্টা কৰিছিল। এই দাবী কৰিছে বিষয়াগৰাকীয়ে। কিন্তু বি এছ এফে সন্ত্ৰাসবাদী অনুপ্ৰৱেশৰ চেষ্টা বিফল কৰে।
বিএছএফৰ ডি আই জি এছ এছ মাণ্ডেয়ে সংবাদ সংস্থা এএনআইক জনোৱা মতে, তেওঁলোকে চোৰাংচোৱাৰ সূত্ৰৰ পৰা তথ্য লাভ কৰে যে আন্তঃৰাষ্ট্ৰীয় সীমান্তৰ মাজেৰে ৪০-৫০ জনীয়া সন্ত্ৰাসবাদীৰ এটা দলে অনুপ্ৰৱেশ কৰিবলৈ চেষ্টা কৰিব পাৰে। যোৱা ৮ মে’ত সীমান্তত কেইবাজনো লোকে সন্দেহজনকভাৱে ভাৰতত প্ৰৱেশৰ চেষ্টা চলাইছিল।
সীমান্ত আৰু ইয়াৰ বাহিৰত পাকিস্তানৰ পৰা ধাৰাবাহিকভাৱে গুলীচালনা চলি আছিল। সেই সুযোগ ব্যৱহাৰ কৰি সন্ত্ৰাসবাদীয়ে অনুপ্ৰৱেশ কৰিবলৈ চেষ্টা কৰে। কিন্তু জোৱানসকলে সন্ত্ৰাসবাদীৰ ওপৰত বোমা বিস্ফোৰণ কৰে। প্ৰত্যাক্ৰমণৰ সন্মুখীন হৈ সন্ত্ৰাসবাদীয়ে পলায়ন কৰিবলৈ ধৰে।
ডি আই জিয়ে লগতে কয় যে দুয়োখন দেশৰ মাজত সামৰিক অস্থিৰতাৰ সুযোগ লৈ পাকিস্তানে এক বৃহৎ বিধ্বংসী অভিযান চলাবলৈ সন্ত্ৰাসবাদীৰ অনুপ্ৰৱেশৰ চেষ্টা কৰিছিল আৰু বিএছএফে ইয়াক বিফল কৰিছে। পহেলগাম কাণ্ডৰ পিছত ভাৰতে পাকিস্তানৰ ভূমিত প্ৰতিশোধ লয়। ইয়াৰ পিছত পাকিস্তানে যুদ্ধবিৰতি উলংঘা কৰি জম্মু-কাশ্মীৰৰ নিয়ন্ত্ৰণৰেখাৰ কাষৰীয়া অঞ্চলত অবিৰতভাৱে গোলাবৰ্ষণ কৰে।
আন্তঃৰাষ্ট্ৰীয় সীমান্ততো অব্যাহত থাকে গোলাবৰ্ষণ। ভাৰতীয় সেনায়ো প্ৰতিশোধ লয়। কেৱল সেয়াই নহয়, পাকিস্তানে জম্মু-কাশ্মীৰৰ উপৰি পঞ্জাৱ, ৰাজস্থান আৰু গুজৰাটতো ড্ৰোন আৰু মিছাইল আক্ৰমণৰ চেষ্টা চলায়। কিন্তু ভাৰতে পাকিস্তানৰ আক্ৰমণক প্ৰতিহত কৰে।
