উমৰাংছুৰ কয়লা খনিত (Umrangso Coal Mining Accident) মঙলবাৰে বৰষুণৰ বাবে উদ্ধাৰকাৰ্য ব্যাহত হোৱাৰ পিছত বুধবাৰে পুৱাৰ পৰা পুনৰ আৰম্ভ হৈছে উদ্ধাৰ অভিযান। আনহাতে, এই উদ্ধাৰ অভিযানত বুধবাৰে পুৱা কয়লা খনিটোত আবদ্ধ হৈ থকা এজন শ্ৰমিকৰ মৃতদেহ উদ্ধাৰ কৰিবলৈ সক্ষম হয় উদ্ধাৰকাৰীয়ে।
উল্লেখ্য যে কয়লা খনিটোত মুঠ নজন লোক আবদ্ধ হৈ থকাৰ তথ্য পোৱা গৈছে যদিও এতিয়াও আন আঠজন শ্ৰমিকক উদ্ধাৰ কৰিব পৰা হোৱা নাই৷ অৱশ্যে উদ্ধাৰকাৰী দলে যুদ্ধকালীন তৎপৰতাৰে উদ্ধাৰ অভিযান অব্যাহত ৰাখিছে৷
এই উদ্ধাৰকাৰ্যত জড়িত হৈ আছে এনডিআৰএফ, এছডিআৰএফকে ধৰি বিশাখাপট্টনমৰ পৰা অহা ভাৰতীয় নৌসেনাৰ বিশেষ উদ্ধাৰকাৰী দল। মঙলবাৰে সন্ধিয়া ভাৰতীয় নৌসেনাৰ ১২ জনীয়া দলটো উমৰাংছুত উপস্থিত হয়। নৌসেনাৰ ডুবাৰু দলটোৱে বিভিন্ন উদ্ধাৰ সঁজুলি লৈ অভিযান অব্যাহত ৰাখিছে।
ইফালে মুখ্যমন্ত্ৰী ডঃ হিমন্ত বিশ্ব শৰ্মাই উদ্ধাৰ হোৱা মৃত শ্ৰমিকজনৰ পৰিয়াললৈ সমবেদনা জ্ঞাপন কৰিছে। সামাজিক মাধ্যমৰ এক পোষ্টযোগে মুখ্যমন্ত্ৰীয়ে কয় যে ২১ পেৰা ডুবাৰুৰ দলটোৱে কুঁৱাৰ ভিতৰৰ পৰা এটা মৃতদেহ উদ্ধাৰ কৰিছে। শোকাতুৰ পৰিয়াললৈ আমাৰ সমবেদনা জনালোঁ।
উল্লেখ্য যে প্ৰাপ্ত তথ্য অনুসৰি, খনিৰ ভিতৰত আবদ্ধ হৈ থকা শ্ৰমিকসকল হৈছে গংগা বাহাদুৰ শ্ৰেষ্ঠ (৩৮), উদয়পুৰ, নেপাল, হুছেইন আলী (৩০), দলগাঁও, জাকিৰ হুছেইন (৩৮), দলগাঁও, সৰ্প বৰ্মন (৪৬), গোসাইগাঁও, মুস্তাফা শ্বেখ (৪৪), দলগাঁও, খুচী মোহন ৰায় (৫৭), ফকিৰাগ্ৰাম, সঞ্জিত সৰকাৰ (৩৫), জলপাইগুৰি, পশ্চিমবংগ, লিজান মগৰ (২৬), উমৰাংছু, ডিমা হাছাও, শৰৎ গয়াৰী (৩৭), বাতাসীপুৰ, শোণিতপুৰ।
