ASSAM TIMES POST
নিউজ ডেক্সঃ
এনডিএবিৰ শীৰ্ষ বিষয়ববীয়াসহ অন্যান্য ২৭গৰাকী কেডাৰ তথা সদস্য শীঘ্ৰেই মূলসুঁতিলৈ উভতি আহিব। আজি এই কথা এক সংবাদ মেলযোগে জানিবলৈ দিয়ে অসম আৰক্ষীৰ ডিজিপি ভাস্কৰজ্যোতি মহন্তই। এছ এছ কেপ্টেইন বি চাওৰাগ্লাই ওৰফে অমৰ বসুমতাৰীৰ নেতৃত্বত এইসকল এনডিএফবি সদস্যই আত্মসমৰ্পণ কৰিব বুলি সংবাদ মেলত প্ৰকাশ কৰে ডিজিপি মহন্তই।
তেওঁলোকৰ এই আত্মসমৰ্পণক অসম তথা ভাৰত চৰকাৰে আদৰণি জনোৱা বুলি উল্লেখ কৰি এই সম্পৰ্কত এনডিএফবি সদস্যকেইজনৰ লগত বৃহস্পতিবাৰে এক আলোচনাত মিলিত হোৱা বুলিও তেওঁ লগতে জনায়। সংবাদ মেলত ডিজিপিগৰাকীয়ে কয় যে আত্মসমৰ্পণ কৰিবলগীয়া এনডিএফবি সদস্যকেইজনৰ লগত ভাৰত চৰকাৰৰ হৈ শীঘ্ৰে এখন চুক্তিত স্বাক্ষৰ কৰা হ’ব।
উল্লেখ্য যে চাওৰাইগ্লাৰ নেতৃত্বত আত্মসমৰ্পণ কৰিবলগীয়া আন আন নেতাসকলৰ ভিতৰত অন্যতম হৈছে ৰঞ্জিত বসুমতাৰী ওৰফে বি আৰ ফেৰেংগা, বি দৈমলু ওৰফে দয়াল বড়ো। আনহাতে, তেওঁলোকৰ লগতে আন আন সদস্য তথা পৰিয়ালৰ সদস্য থকা বুলিও জানিবলৈ দিয়ে মহন্তই। ইফালে তেওঁলোকক অসম আৰক্ষীয়ে এক বিশেষ স্থানত ৰাখি থোৱা বুলিও উল্লেখ কৰি ডিজিপি ভাস্কৰজ্যোতি মহন্তই শান্তি প্ৰক্ৰিয়াৰ ক্ষেত্ৰত এইটো এক অন্যতম পৰিঘটনা বুলিও উল্লেখ কৰে।
