ASSAM TIMES POST
নগাঁওঃ আৰক্ষী-নিৰাপত্তা বাহিনীৰে গিজগিজাই থকা নগাঁও চহৰৰ ভিন্ন প্ৰান্তত আজি নিচেই পুৱাতেই উৰিল ক’লা পতাকা।নগাঁও জিলা উপাযুক্তৰ কাৰ্যালয়ৰ প্ৰৱেশদ্বাৰ, ট্ৰেফিক চিগন্যেল পইন্ট, নগাঁও কলেজ চ’ক,বৈদ্যুতিক খুঁটা,টেলিফোনৰ খুঁটা, ৰাজপথৰ দাঁতি আদিত আজি পুৱতি নিশাতেই ক’লা পতাকা উৰুৱাই সংশোধিত নাগৰিকত্ব আইনৰ বিৰুদ্ধে তীব্ৰ প্ৰতিবাদ সাব্যস্ত কৰে জাতীয়তাবাদী যুৱ ছাত্ৰ পৰিষদৰ নগাঁও জিলা সমিতিৰ সদস্য সকলে।
পৰিষদৰ সদস্য সকলে চহৰ খনত ক’লা পতাকা অঁৰা কাৰ্য ইমানেই সংগোপনে কৰিছিল যে নগাঁও আৰক্ষীয়ে কোনো ততকে ধৰিব পৰা নাছিল।ইপিনে আজি পুৱা জিলা উপায়ুক্তৰ কাৰ্যালয়ৰ মুখ্য প্ৰৱেশ পথৰ লোৰ গেটকে ধৰি চহৰ খনৰ ভিন্ন প্ৰান্তত অসংখ্য ক’লা পতাকা উৰি থকা দেখা পাই নগাঁও আৰক্ষী হতভম্ব হৈ পৰে।লগে লগেই নগাঁও আৰক্ষীয়ে আটাইবোৰ ক’লা পতাকা সেই স্থান সমূহৰ পৰা আঁতৰাই লৈ যায়। আনহাতে আজি পুৱা ১০ বজাত পৰিষদৰ সদস্য সকলে হাতে হাতে কলা পতাকা লৈ নগাঁও চহৰত এক প্ৰতিবাদী সমদল উলিয়ায়। পৰিষদৰ শতাধিক সদস্যই হাতে হাতে কলা পতাকা লৈ “কা” বাতিলৰ দাবী আৰু অসমৰ পৰা ইনাৰলাইন পাৰ্মিট ব্যৱস্থা কৰ্তনৰ প্ৰতিবাদত এই সমদল উলিয়ায়।
চহৰ খনৰ নতুন বজাৰৰ পৰা ওলোৱা সমদলত অংশগ্ৰহণ কৰা সদস্য সকলে বিভিন্ন ধ্বনি দি নগাঁৱৰ ৰাজপথ উত্তাল কৰি তোলে। সমদল কাৰী দলটো নগাঁও কলেজৰ ওচৰ পাওঁতেই নগাঁও সদৰ থানাৰ আৰক্ষীৰ এটা বৃহৎ দলে সমদল কাৰী সকলক বাধা প্ৰদান কৰে। ইয়াক কেন্দ্ৰ কৰি দুই পক্ষৰ মাজত তীব্ৰ বাক-বিতণ্ডাৰ সৃষ্টি হয়। পিছত আৰক্ষীয়ে প্ৰতিবাদ কাৰী দলটোৰ প্ৰায় ৫০ জন সদস্যক বলপূৰ্বক ভাৱে আটক কৰি নগাঁও সদৰ থানালৈ লৈ যায়। জিলা যুৱ ছাত্ৰ পৰিষদৰ সাধাৰণ সম্পাদক প্ৰাগজ্যোতিষ বনিয়া, উপদেষ্টা মনোজ সিংহ ৰাজা , নগাঁও নগৰ সমিতিৰ সভাপতি কাশ্যপ ফুকন আদিকো আৰক্ষীয়ে আটক কৰে।
আটকাধীন পৰিষদৰ সদস্য সকলে থানা চৌহদতো জয় আই অসম ধ্বনি দিয়ে। ইয়াতে ক্ষুন্ন হৈ নগাঁও সদৰ থানাৰ ভাৰপ্ৰাপ্ত বিষয়া গৰাকীয়ে পৰিষদৰ সদস্য সকলক দুব্যৱহাৰ কৰাৰ লগতে ঠেলি হেঁচি গতিয়াই দিয়ে। ইয়াক কেন্দ্ৰ কৰি নগাঁৱত প্ৰতিক্ৰিয়াৰ সৃষ্টি হৈছে । আৰক্ষী বিষয়া গৰাকীৰ এনে কাৰ্যক যুৱ ছাত্ৰ পৰিষদৰ লগতে বিভিন্ন সংগঠনে গৰিহনা দিছে। পৰিষদৰ নগাঁও জিলা সমিতিয়ে আৰক্ষী বিষয়া গৰাকীক শীঘ্ৰে নিলম্বন কৰিবলৈ দাবী জনাইছে। ইপিনে যুব ছাত্ৰ পৰিষদে সন্ধিয়া নতুন বজাৰত দেশৰ প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহৰ পুত্তলিকা দাহ কৰে ।
