ASSAM TIMES POST
নগাঁওঃ নগাঁও জিলাৰ কুৰুৱাবাহীত আজি সন্ধিয়া সংঘটিত এক ভয়াৱহ পথ দুৰ্ঘটনাত মহিলা সহ পাঁচজন লোক নিহত হোৱাৰ লগতে চাৰিজন লোক গুৰুতৰভাৱে আহত হয়। দুৰ্ঘটনাত নিহত লোক কেইজন হৈছে- প্ৰাঞ্জল বৰদলৈ, আতিকুৰ ৰহমান, সোনটি আহমেদ, দুলুমনি দেৱী আৰু আফাজ আহমেদ ।
আনহাতে আহতসকল ক্ৰমে তন্ময় নাথ, হেমন্ত হীৰা, ডিম্বেশ্বৰ হীৰা আৰু সোম ভৰালী । প্ৰাপ্ত খবৰ মতে, আজি সন্ধিয়া নগাঁও চহৰৰ পৰা জাজৰি অভিমুখে গৈ থকা এ এচ ০২ ই ৬১৫২ নম্বৰৰ যাত্ৰীবাহী টেম্পুখনৰ সৈতে মৰিগাঁও দিশৰ পৰা আহি থকা এএচ ০২ এচি ০৭৩৬ নম্বৰৰ দ্ৰুতবেগী ডাম্পাৰখনৰ মুখামুখি সংঘর্ষ হয়।
দুৰ্ঘটনাটো ইমানেই ভয়াবহ আছিল যে টেম্পুখন ভাগি যোৱাৰ লগতে ড্ৰাম্পাৰখন পথৰ ওপৰতে বাগৰি পৰে। ফলত ঘটনাস্হলীতে টেম্পুখনৰ যাত্ৰী জামুগুৰিৰ দুলুমণি দেৱী আৰু জাজৰিৰ আফাজ আহমেদ থিতাতে নিহত হয় । আনহাতে গুৰুতৰ ভাবে আহত টেম্পুখনৰ যাত্ৰী সকলক জাজৰি থানাৰ আৰক্ষীয়ে ততাতৈয়াকৈ নগাঁও ভোগেশ্বৰী ফুকননী অসামৰিক চিকিৎসালয়লৈ প্রেৰণ কৰে যদিও চিকিৎসাধীন অৱস্থাত বাকী তিনিজন লোকৰ মৃত্যু হয়।
আনহাতে গুৰুতৰ ভাবে আহতসকলৰ দুজনক গুৱাহাটী চিকিৎসা মহাবিদ্যালয়লৈ প্ৰেৰণ কৰে বুলি জানিব পৰা গৈছে । ইপিনে দূৰ্ঘটনাতো সংঘটিত কৰি ডাম্পাৰখনৰ চালকজনে পলায়ন কৰে। এই দুৰ্ঘটনাৰ ফলত উক্ত পথত কেইবা ঘন্টা ধৰি যানবাহনৰ চলাচল ব্যাহত হৈ পৰে ।
