সাহিত্য- আলোচনী গৰীয়সীৰ প্ৰতিষ্ঠাপক সম্পাদক তথা প্ৰথিতযশা কথাশিল্পী পদ্মভূষণ চন্দ্ৰপ্ৰসাদ শইকীয়াৰ (Chandraprasad Saikia) স্মৃতিত আছাম ট্ৰিবিউন প্ৰতিষ্ঠানৰ দ্বাৰা প্ৰৱৰ্তিত “গৰীয়সী-চন্দ্ৰপ্ৰসাদ শইকীয়া চুটিগল্প পুৰস্কাৰ-২০২৩” আজি এক গাম্ভীৰ্যপূৰ্ণ অনুষ্ঠানত গুৱাহাটী প্ৰেছ ক্লাবত প্ৰদান কৰা হয়। আছাম ট্ৰিবিউন প্ৰতিষ্ঠানৰ পৰিচালন সঞ্চালক পদ্মশ্ৰী প্ৰফুল্ল গোবিন্দ বৰুৱাই কথা শিল্পী চন্দ্ৰপ্ৰসাদ শইকীয়াৰ প্ৰতিচ্ছবিত বন্তি প্ৰজ্বলনেৰে শুভাৰম্ভ কৰা আৰু গৰীয়সীৰ সম্পাদক বিশিষ্ট সাহিত্যিক ডঃ ৰীতা চৌধুৰীয়ে সভাপতিত্ব কৰা অনুষ্ঠানটোত আদৰণী ভাষণ আগবঢ়ায় গৰীয়সীৰ উপ-সম্পাদক সমীন্দ্ৰ ডেকাই।
সৃষ্টিশীল লেখক পদ্মশ্ৰী ডঃ অৰূপ কুমাৰ দত্ত মুখ্য অতিথি হিচাপে উপস্থিত থাকি গল্প-সাহিত্যৰ সন্দৰ্ভত সাৰগৰ্ভ ব্যক্তব্য প্ৰদান কৰা সভাখনত প্ৰতিযোগিতাখনৰ বিচাৰকত্ৰয় ডাঃ অপূৰ্ব কুমাৰ শইকীয়া , ডঃ পৰী হিলৈদাৰী আৰু ডঃ কল্পনা শৰ্মাই গল্পৰ বিচাৰকৰ ভাষণ দাঙি ধৰে ।
মুখ্য অতিথি ডঃ অৰূপ কুমাৰ দত্তই প্ৰথম পুৰস্কাৰ প্ৰাপ্ত শিল্পী শৰ্মা, দ্বিতীয় পুৰস্কাৰপ্ৰাপ্ত দেৱজিৎ কলিতা আৰু তৃতীয় পুৰস্কাৰ প্ৰাপ্ত খনিন্দ্ৰ ভূষণ মহন্তক নগদ ধন, মানপত্ৰ আৰু গৰীয়সী স্মাৰক প্ৰদান কৰে। লগতে উদ্গনি বঁটা লাভ কৰা ক্ৰমে মনালিছা বৰঠাকুৰ, দীক্ষিতা বৰা, খামমুন ফুকন, অৰূপ ৰাজ কলিতা, ৰথাংগ পাণি বৰুৱা আৰু ডেইটী মানপত্ৰ প্ৰদান কৰা হয় । উল্লেখযোগ্য যে প্ৰথম, দ্বিতীয় আৰু তৃতীয় পুৰস্কাৰ হিচাপে ক্ৰমে আগবঢ়োৱা হয় ১০,০০০ টকা, ৭০০০ টকা আৰু নগদ ৫০০০ টকা।
অনুষ্ঠানটোত দৈনিক অসম কাকতৰ সম্পাদক ডঃ হিতেশ ডেকা, অসম বাণীৰ সম্পাদক দিলীপ চন্দন, দৈনিক অসমৰ কাৰ্যবাহী সম্পাদক দিলীপ মহন্ত, পদ্মশ্ৰী সন্মানপ্ৰাপক ডঃ ৰোমান শৰ্মা, দৈনন্দিন বাৰ্তাৰ মুখ্য সম্পাদক নৰেন হাজৰিকা, অসীম কুমাৰ ডেকা, আছাম ট্ৰিবিউন এপ্লইজ ইউনিয়নৰ সম্পাদক দুগ্ধ ৰাম কলিতা, বনজিৎ ভট্টাচাৰ্য্য আদি বিশিষ্ট ব্যক্তিসকল উপস্থিত থাকে।
