অহা ১২ মে’ত অসমত বিজেপি (Assam BJP) নেতৃত্বাধীন এনডিএ (NDA) চৰকাৰে তৃতীয়টো কাৰ্যকালৰ বাবে শপতগ্ৰহণ (Swearing-in of the third term) কৰিব। এই শপত গ্ৰহণ অনুষ্ঠানৰ বাবে গুৱাহাটীৰ (Guwahati) খানাপাৰাস্থিত পশু চিকিৎসা মহাবিদ্যালয় খেলপথাৰ (Veterinary College Playground)ত বিশাল আয়োজন চলিছে। শপতগ্ৰহণ অনুষ্ঠানৰ প্ৰস্তুতি সন্দৰ্ভত বৃহস্পতিবাৰে ৰাজ্যিক বিজেপিৰ মুখ্য কাৰ্যালয়ত সভাপতি দিলীপ শইকীয়াৰ অধ্যক্ষতাত এক বৈঠক অনুষ্ঠিত হয়। উক্ত বৈঠকত বিধায়ক পীযুষ হাজৰিকা, জয়ন্তমল্ল বৰুৱা, কৌশিক ৰায়, ৰাজ্যিক সাংগঠনিক সাধাৰণ সম্পাদক ৰবীন্দ্ৰ ৰাজু আদি উপস্থিত থাকে।
বৈঠকৰ অন্তত সভাপতি দিলীপ শইকীয়াই জনোৱা মতে, শপতগ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোদী, বিজেপিৰ ৰাষ্ট্ৰীয় সভাপতি নীতিন নবীন, কেন্দ্ৰীয় গৃহমন্ত্ৰী অমিত শ্বাহ, এনডিএ শাসিত ৰাজ্যসমূহৰ মুখ্যমন্ত্ৰী তথা উপ-মুখ্যমন্ত্ৰীসকল, কেন্দ্ৰীয় চৰকাৰৰ জ্যেষ্ঠ কেবিনেট মন্ত্ৰীসকল, ৰাজ্যখনৰ বিভিন্ন ক্ষেত্ৰৰ বিশিষ্ট ব্যক্তিসকল, ভাৰতীয় জনতা পাৰ্টী তথা এনডিএৰ বুথ সভাপতিকে ধৰি দলৰ আত্মীয় কাৰ্যকৰ্তাসকলৰ লগতে শুভাকাংক্ষীসহ প্ৰায় ১ লাখ লোক উপস্থিত থাকিব। শপত গ্ৰহণ অনুষ্ঠানৰ পূৰ্বে ১০ মে’ত ৰাজ্যিক বিজেপিৰ কাৰ্যালয়ত বিজেপি বিধায়নী দলৰ বৈঠক আৰু এনডিএ বিধায়িনী দলৰ বৈঠক অনুষ্ঠিত হ’ব। উল্লেখ্য যে বিধায়িনী দলৰ নেতা নিৰ্বাচনৰ বাবে ইতিমধ্যে কেন্দ্ৰীয় মন্ত্রী জে পি নাড্ডাক কেন্দ্ৰীয় পৰ্যবেক্ষক আৰু হাৰিয়ানাৰ মুখ্যমন্ত্রী নায়ব সিং ছৈনীক সহ-পৰ্যবেক্ষক হিচাপে নিযুক্তি দিয়া হৈছে।
