অসমৰ মুখ্যমন্ত্ৰী হিমন্ত বিশ্ব শৰ্মাই (Himanta Biswa Sarma)প্ৰকাশ কৰা মতে, ২০২২-২০২৩ বিত্তীয় বৰ্ষত ৰাজ্যখনলৈ পৰ্যটকৰ আগমন ৫৭৫% বৃদ্ধি পাইছে। ৰাজ্যখনে এই সময়ছোৱাত ১ কোটিৰো অধিক পৰ্যটকক আদৰণি জনাইছে। ইয়াৰ ফলত ই অসমৰ পৰ্যটন উদ্যোগৰ বাবে এক গুৰুত্বপূৰ্ণ মাইলৰ খুঁটি হৈ পৰিছে।
মুখ্যমন্ত্ৰীয়ে দেওবাৰে সোণাপুৰত মেফেয়াৰ গ্ৰুপে নিৰ্মাণ কৰা 200 কোঠাৰ ৰিজ’ৰ্ট এখন উদ্বোধন কৰাৰ পিছত এই ঘোষণা কৰে। তেওঁ লগতে কয় যে এনেধৰণৰ ৰিজ’ৰ্ট আদি নিৰ্মাণৰ দ্বাৰা ৰাজ্যখনত পৰ্যটন আন্তঃগাঁথনি বৃদ্ধি হ’ব। আনহাতে, মুখ্যমন্ত্ৰী হিমন্ত বিশ্ব শৰ্মাই টুইট কৰি কয়, “অধিক পৰ্যটন আন্তঃগাঁথনিৰ সমৰ্থনৰ বাবে গুৱাহাটীৰ ওচৰত মেফেয়াৰ গ্ৰুপে নিৰ্মাণ কৰা ২০০ কোঠাৰ এক অত্যাধুনিক ৰিজ’ৰ্ট উদ্বোধন কৰি মই আনন্দিত হৈছো। পৰিচালকসকলক অভিনন্দন জনাইছোঁ।”
উল্লেখ্য, অসম পৰ্যটন উন্নয়ন নিগমৰ পৰিচালন সঞ্চালক পদ্মাপাণি বৰাই জনোৱা মতে, পূৰ্বৰ বিত্তীয় বৰ্ষ, 2021-2022 ত 17.5 লাখ ঘৰুৱা পৰ্যটকৰ আগমন পঞ্জীয়ন কৰা হৈছিল। ইয়াৰ উপৰি, উত্তৰ-পূব ভ্ৰমণ কৰা 11.8 নিযুত পৰ্যটকৰ ভিতৰত অসমে প্ৰায় 10 নিযুত অৰিহণা যোগাইছিল। যিয়ে পৰ্যটকসকলৰ মাজত আগ্ৰহ যথেষ্ট বৃদ্ধি হোৱাৰ ইঙ্গিত দিয়ে।
