পোহনীয়া উটৰ (Pet Camel) হাতত মৃত্যু হয় মালিকৰ। উটটোৱে মালিকৰ মূৰটো চোবাই তাৰ পিছত মাটিত পেলাই দিয়ে। ফলত উটটোৰ মালিকৰ থিতাতে মৃত্যু হয়। পিছত উটটো গছত বান্ধি লাঠিৰে প্ৰহাৰ কৰা হয়। উটটোও তাতেই মৃত্যুমুখত পৰে। ৰাজস্থান (Rajathan)ৰ বিকানেৰৰ পাঞ্চু গাঁৱত (In Panchu village) সংঘটিত হৈছে এই ঘটনা।
কথাতেই আছে, উট এটা বিচলিত হʼলে তাৰ মালিকো নিৰাপদ নহয়। বিকানেৰত সেই কথাষাৰৰ প্ৰকৃত প্ৰতিফলন ঘটিল। জানিব পৰা মতে, পাঞ্চু গাঁৱত মালিকে এটা উট বান্ধি থৈছিল। ইটোৰ পিছত সিটো উট ঘূৰি ফুৰা দেখি সেই উটটোৱেও বান্ধ খুলি ওলাই আহিব বিচাৰে। কিন্তু বন্ধনটো টান আছিল। বহু চেষ্টাৰ অন্তত উটটোৱে সফল হ’ব নোৱাৰাত খঙাল হৈ উঠে।
সেই দেখি মালিকে উটটো চম্ভালিবলৈ আহে। কিন্তু মালিকক দেখি উটটো অধিক বিচলিত হয়। সি পোনে পোনে আহি মালিকক আক্ৰমণ কৰে। প্ৰত্যক্ষদৰ্শীয়ে দাবী কৰা মতে, উটটোৱে মালিকৰ মূৰত কামুৰি ওপৰলৈ তুলি লৈ যায়। তেনে পৰিস্থিতিত মালিকে হাত-ভৰি মাৰি আছিল। ইয়াৰ পিছত উটটোৱে মালিকক মাটিত পেলাই দিয়ে। কিন্তু মালিকৰ মূৰটো উটৰ মুখত আছিল। উটটোৰ মালিকৰ থিতাতে মৃত্যু হয়।
ইয়াৰ পিছতে গাঁৱত হুলস্থুলৰ সৃষ্টি হʼল। ‘পাগল’ উটটোক চম্ভালিবলৈ সকলোৱে পথাৰত প্ৰৱেশ কৰে। অৱশেষত উটটো ধৰা পৰে। তেতিয়া উটটো শান্ত হৈ পৰে। ইয়াৰ পিছত উটটোক এজোপা গছত বান্ধি লৈ লাঠিৰে প্ৰহাৰ কৰা হয়। লাঠিৰ আঘাত সহ্য কৰিব নোৱাৰি উটটোৱে থিতাতে মৃত্যুক সাৱটি লয়।
