জ্যেষ্ঠ সাংবাদিক (Senior Journalist) তথা বিশিষ্ট গল্পকাৰ মনোজ কুমাৰ গোস্বামী (Manoj Kumar Goswami)লৈ আগবঢ়োৱা হৈছে ২০২২ বৰ্ষৰ অসমীয়া ভাষাৰ (Assamese) বাবে সাহিত্য অকাডেমি বঁটা (Sahitya Academy Award)৷ তেওঁৰ ‘ভুল সত্য’ গ্ৰন্থখনৰ বাবে এই বঁটা প্ৰদান কৰা হৈছে৷
উল্লেখ্য, ১৯৬২ চনত নগাঁৱত জন্মগ্ৰহণ কৰা মনোজ কুমাৰ গোস্বামী হৈছে এগৰাকী জ্যেষ্ঠ সাংবাদিকৰ লগতে প্ৰসিদ্ধ লেখক । বিগত কেইবাটাও দশক ধৰি তেওঁৰ কলমেৰে সৃষ্টি কৰ্ম নিগৰি আছে।
নগাঁও মহাবিদ্যালয়ৰ পৰা কলেজীয়া শিক্ষা সাং কৰি তেওঁ গুৱাহাটী বিশ্ববিদ্যালয়ৰ পৰা পদাৰ্থবিজ্ঞান বিষয়ত স্নাতকোত্তৰ ডিগ্ৰী লাভ কৰে । কিছুদিন শিক্ষকতা কৰাৰ পিছত তেওঁ বিশিষ্ট সাহিত্যিক চন্দ্ৰপ্ৰসাদ শইকীয়াৰ সম্পাদনাত প্ৰকাশিত ‘নতুন দৈনিক’ কাকতৰ জৰিয়তে ১৯৮৬ চনত সাংবাদিকতাৰ জগতত প্ৰৱেশ কৰে ।
তাৰ পৰৱৰ্তী সময়ত তেওঁ আজিৰ বাতৰি, আমাৰ অসম, জনসাধাৰণ আদি কাকতসমূহত সাংবাদিকতা আৰু পৰৱৰ্তী সময়ত সম্পাদক তথা কাৰ্যবাহী সম্পাদকৰূপে কাৰ্যনিৰ্বাহ কৰে । ইয়াৰ পিছত তেওঁ প্ৰায় ১২ বছৰ ধৰি ডি ৱাই ৩৬৫ৰ মুখ্য সম্পাদকৰ দায়িত্বত থাকে। তাৰ পৰা ২০২০ চনত আমাৰ অসম কাকতৰ মুখ্য সম্পাদকৰূপে কাৰ্যভাৰ গ্ৰহণ কৰে৷ ঈশ্বৰহীনতা, স্বাধীনতা, সমীৰণ বৰুৱা আহি আছে, প্ৰেমহীনতা, এলুমিনিয়ামৰ আঙুলি আদি মনোজ কুমাৰ গোস্বামীৰ জনপ্ৰিয় আৰু মননশীল গল্প সংকলন ৷ আনহাতে ‘অনাদি আৰু অনন্য’ হৈছে মনোজ কুমাৰ গোস্বামীৰ প্ৰকাশিত একমাত্ৰ উপন্যাস ৷
