সমগ্ৰ ৰাজ্য জোকাৰি যোৱা নলবাৰীৰ আছু নেতাক হত্যা (Nalbari Encounter) আৰু ভগ্নীক আক্ৰমণকাৰীক আৰক্ষীৰ এনকাউণ্টাৰ। পশ্চিম নলবাৰী আঞ্চলিক ছাত্ৰ সন্থাৰ সহকাৰী সাধাৰণ সম্পাদক মাধুৰ্য বৰ্মনক হত্যাকাৰী আছিফ আলী ওৰফে ৰ’জ আলীক মুকালমুৱা চৰত এনকাউণ্টাৰ।
আৰক্ষীয়ে আটক কৰাৰ সময়ত আৰক্ষীৰ পৰা বন্দুক কাঢ়ি লোৱাৰ চেষ্টা কৰাত আৰক্ষীয়ে তেওঁক এনকাউণ্টাৰ কৰে। এই এনকাউণ্টাৰত নিহত হয় নলবাৰীৰ আছু নেতাৰ হত্যা আৰু ভগ্নীক আক্ৰমণৰ মূল অভিযুক্ত আছিফ আলী ওৰফে ৰ’জ আলী।
উল্লেখ্য যে দেওবাৰে নিশা প্ৰায় ৮ বজাত নলবাৰীত সংঘটিত হয় এক বৰ্বৰোচিত হত্যাকাণ্ড। সদৌ অসম ছাত্ৰ সন্থাৰ পশ্চিম নলবাৰী আঞ্চলিক সমিতিৰ সহকাৰী সাধাৰণ সম্পাদক মাধুৰ্য বৰ্মন আৰু তেওঁৰ সম্পৰ্কীয় ভগ্নী মৃদুমুদ্ৰা বৰ্মনক নলবাৰী চহৰৰ পৰা বজাৰ কৰি আহি থকা সময়তে গংগাপুৰত ৰাজপথতে বৰ্বৰোচিতভাৱে আক্ৰমণ কৰে।
এই আক্ৰমণত মাধুৰ্য বৰ্মনৰ মৃত্যু হোৱাৰ বিপৰীতে তেওঁৰ ভগ্নী গুৰুতৰভাৱে আঘাতপ্ৰাপ্ত হৈ বৰ্তমান জিএমচিএইচত জীৱন-মৃত্যুৰে যুঁজি আছে। এই ঘটনাৰ বাতৰি প্ৰকাশ পোৱাৰ পিছতে ৰাজ্যৰ সৰ্বত্ৰে তীব্ৰ প্ৰতিক্ৰিয়াৰ সৃষ্টি হয়। লগতে দোষীক কৰায়ত্ত কৰি কঠোৰৰ পৰা কঠোৰতম শাস্তিৰ দাবী জনায়।
ইয়াৰ পিছতে আৰক্ষী সষ্টম হৈ পৰে আৰু সোমবাৰে দুপৰীয়া মুৰালমুৱা চৰত আত্মগোপন কৰি থকা অৱস্থাত মূল অভিযুক্ত আছিফ আলীক আটক কৰে। কিন্তু আৰক্ষীৰ বন্দুক কাঢ়ি পলায়ন কৰিবলৈ চেষ্টা কৰাৰ সময়তে আৰক্ষীৰ এনকাউণ্টাৰত নিহত হয় আছিফ আলী।
উল্লেখ্য যে প্ৰেমজনিত কাৰণতেই এই হত্যাকাণ্ড সংঘটিত হোৱা বুলি ইতিমধ্যে প্ৰকাশ পাইছে। উচ্চতৰ মাধ্যমিকৰ দ্বিতীয় বৰ্ষত অধ্যয়নৰত মাধুৰ্য বৰ্মনৰ মাহীয়েকৰ কন্যা মৃদুমুদ্ৰা বৰ্মনক বিগত বহু দিনৰে পৰা আছিফ আলীয়ে প্ৰেমৰ প্ৰস্তাৱ দি আহিছিল বুলি অভিযোগ।
কিন্তু সেই প্ৰস্তাৱ নাকচ কৰি আহিছিল ছাত্ৰীগৰাকীয়ে। ইয়াৰে পিছতে দেওবাৰে নিশা চৰম কাণ্ড সংঘটিত কৰে আছিফ আলীয়ে। নলবাৰী চহৰৰ পৰা বজাৰ কৰা ওভতাৰ পথত দুয়োৰে ওপৰতে বৰ্বৰ আক্ৰমণ কৰে আছিফ আলীৰ নেতৃত্বৰ এটা দলে।
ৰাজপথতে হানি-খুঁচি হত্যা কৰে মাধুৰ্য বৰ্মনক। আনহাতে, গুৰুতৰভাৱে আহত হয় তেওঁৰ সম্পৰ্কীয় ভগ্নীগৰাকী। ইয়াৰ পিছতে ৰাজ্যজুৰি দোষীক কৰায়ত্ত কৰি কঠোৰৰ পৰা কঠোৰতম শাস্তি প্ৰদানৰ দাবী উঠে। অৱশেষত সোমবাৰে দুপৰীয়া আৰক্ষীৰ এনকাউণ্টাৰত নিহত হয় আছিফ আলী।
