অহা সপ্তাহত ভাৰত-বাংলাদেশ সীমান্তত (India Bangladesh Border) এক বৈঠকত মিলিত হ’ব নতুন দিল্লী আৰু ঢাকাৰ। দুয়োখন দেশৰ বিএছএফ আৰু বিজিবিৰ মাজত উচ্চ পৰ্যায়ৰ বৈঠক অনুষ্ঠিত কৰা হৈছে। অহা ৮ জুনত নতুন দিল্লীত এই তিনিদিনীয়া বৈঠক আৰম্ভ হ’ব৷
সীমান্তত কাঁইটীয়া তাঁৰ, অনুপ্ৰৱেশ ৰোধ আৰু বাংলাদেশী অবৈধ অনুপ্ৰৱেশকাৰীক বিজিবিক গতাই দিয়াৰ বিষয়বোৰ বৈঠকত উত্থাপন হোৱাৰ সম্ভাৱনা আছে। তদুপৰি বিএছএফৰ জোৱানৰ ওপৰত আক্ৰমণৰ অভিযোগো দুয়োখন দেশৰ বাহিনীৰ মুৰব্বীসকলৰ এই বৈঠকত চৰ্চা হোৱাৰ সম্ভাৱনা আছে।
বিজিবিৰ প্ৰতিনিধি দলটোৰ নেতৃত্বত থাকিব দেশখনৰ বাহিনীটোৰ ডিজি মেজৰ জেনেৰেল মহম্মদ আশ্ৰাফুজ্জামান ছিদ্দিকী। আনহাতে, ভাৰতীয় প্ৰতিনিধি দলটোৰ নেতৃত্বত থাকিব বিএছএফৰ মুৰব্বী প্ৰবীণ কুমাৰ। উল্লেখ্য় যে এই বৈঠক এনে এটা সময়ত হ’বলৈ গৈ আছে, যিসময়ত ভাৰতে বাংলাদেশ সীমান্তত চোৰাংচোৱাগিৰি আৰু অধিক বৃদ্ধি কৰিছে।
পশ্চিমবংগৰ নতুন বিজেপি চৰকাৰে সীমান্তত কাঁইটীয়া তাঁৰ লগোৱাৰ বাবে বিএছএফক ভূমি অৰ্পণ কৰিছে। অনুপ্ৰৱেশকাৰীক ধৰা পৰিলে বিএছএফক গতাই দিয়াৰ সিদ্ধান্ত লোৱা হৈছে। অনুপ্ৰৱেশকাৰীক ৰখাৰ বাবে প্ৰতিখন জিলাতে আশ্য়ৰ শিবিৰো মুকলি কৰা হৈছে।
উল্লেখ্য যে ভাৰত আৰু বাংলাদেশৰ মাজত প্ৰায় ৪০৯৬ কিলোমিটাৰ দৈৰ্ঘ্যৰ আন্তৰ্জাতিক সীমান্ত আছে। ইয়াৰ প্ৰায় ৮৬০ কিলোমিটাৰ বেৰবিহীন হৈ আছে। ইয়াৰে সীমান্তৰ প্ৰায় ১৭৪ কিলোমিটাৰ ভৌগোলিক বা অন্যান্য কাৰণত বেৰ দিব পৰা নাই।
এনে পৰিস্থিতিত সীমান্ত অঞ্চলত চোৰাংচোৱাগিৰি আৰু অধিক গুৰুত্বপূৰ্ণ হৈ পৰিছে। চৰকাৰী সূত্ৰৰ উদ্ধৃতি দি পিটিআয়ে কয় যে এই বৈঠকত সীমান্তৰ অপৰাধ ৰোধ আৰু দুয়োটা শক্তিৰ মাজত সহযোগিতা সম্পৰ্কে আলোচনা কৰা হ’ব।
