ভিষ্টাৰা (Vistara) একত্ৰিত (Consolidated) হʼব পাৰে এয়াৰ ইণ্ডিয়া (Air India)ৰ সৈতে। মঙলবাৰে ছিংগাপুৰ এয়াৰলাইন্সে (Singapore Airlines) টাটাৰ নেতা ৰতন টাটা (Ratan Tata)ৰ কোম্পানীৰ সৈতে চুক্তি (Contract)ত উপনীত হয়। অহা বছৰৰ মাৰ্চ মাহৰ ভিতৰত একত্ৰীকৰণ প্ৰক্ৰিয়া সম্পূৰ্ণ হʼব বুলি কোম্পানী দুটাই অৱগত কৰিছে।
এয়াৰ ইণ্ডিয়াৰ সৈতে ব্যৱসায় একত্ৰিত কৰাৰ এই পদক্ষেপৰ লক্ষ্য হৈছে টাটাৰ সৈতে ছিংগাপুৰ এয়াৰলাইন্সৰ (এছ আই এ) যৌথ উদ্যোগ ভিষ্টাৰাক প্ৰতিযোগিতামূলক বজাৰত অধিক সক্ৰিয় কৰি তোলা।আন্তঃগাঁথনি আৰু সম্পদৰ লাভ উঠোৱা আৰু খৰচ হ্ৰাস কৰাৰ উপৰি টাটাৰ মালিকানাধীন কোম্পানী দুটাৰ একত্ৰীকৰণে বিমান সেৱাৰ ক্ষেত্ৰতো সুবিধা আনিব পাৰে বুলি কেন্দ্ৰীয় অসামৰিক বিমান পৰিবহণ মন্ত্ৰালয়ৰ একাংশ বিষয়াই জনায়।
এই পৰিকল্পনা কাৰ্যকৰী হʼলে দেশৰ এক নম্বৰ বিমান সংস্থা ইণ্ডিগোক পৰাস্ত কৰিবলৈ সক্ষম হʼব টাটাই। এই মাহত ছিংগাপুৰ এয়াৰলাইন্সে কয় যে টাটা আৰু এছ আই এৰ মাজত আলোচনা চলি আছে। টাটা ছন্স আৰু ছিংগাপুৰ এয়াৰলাইন্সৰ যৌথ উদ্যোগ ভিষ্টাৰাই ঘৰুৱা আৰু আন্তঃৰাষ্ট্ৰীয় বিমান সেৱা পৰিচালনা কৰে।
টাটা ছন্স আৰু এছ আই এয়ে কয় যে একত্ৰীকৰণৰ পিছত এছ আই এৰ ২৫.১ শতাংশ অংশীদাৰিত্ব (আনুমানিক ৫,০০০ৰ পৰা ১০,০০০ কোটি টকা) থাকিব। বিগত বৰ্ষৰ অক্টোবৰ মাহত টাটা গ্ৰুপে চৰকাৰী বিমান সংস্থা এয়াৰ ইণ্ডিয়াৰ নিয়ন্ত্ৰণ লয়।
৬৮ বছৰৰ পাছত কেন্দ্ৰীয় বিত্ত মন্ত্ৰালয়ৰ অধীনস্থ ‘ৰাজ্যিক মালিকানাধীন উদ্যোগৰ ব্যক্তিগতকৰণ আৰু নিয়ন্ত্ৰণ বিভাগে’ এয়াৰ ইণ্ডিয়াৰ ব্যক্তিগতকৰণৰ বাবে টাটা ছন্সে দাখিল কৰা ১৮,০০০ কোটি টকাৰ নিবিদাত অনুমোদন জনোৱাৰ লগে লগে টাটাই এয়াৰ ইণ্ডিয়াৰ মালিকীস্বত্ব পুনৰ লাভ কৰে। ইয়াৰ পিছত এয়াৰ ইণ্ডিয়া আৰু ভিষ্টাৰাৰ একত্ৰীকৰণ আৰম্ভ হয়।
উল্লেখ্য, দেশৰ প্ৰথমটো বিমান সংস্থা টাটা গ্ৰুপে প্ৰায় ৯ দশক পূৰ্বে আৰম্ভ কৰিছিল। দেশৰ প্ৰথম পাইলট জে আৰ ডি টাটাৰ দ্বাৰা প্ৰতিষ্ঠা কৰা টাটা এয়াৰলাইন্সে ১৯৪৬ চনত নিজৰ নাম সলনি কৰি এয়াৰ ইণ্ডিয়া (এ আই) কৰে। স্বাধীনতাৰ পিছত ইয়াৰ মালিকীস্বত্ব কেন্দ্ৰীয় চৰকাৰৰ হাতলৈ হস্তান্তৰ কৰা হয়।
ইয়াৰ পিছত ২০১৪ চনত কেন্দ্ৰই দেশৰ বিমান সেৱাত বিদেশী বিনিয়োগৰ পথ প্ৰশস্ত কৰি তোলে। সেই বছৰৰ জুন মাহত টাটাই মালয়েছিয়াৰ টাইকুন টনি ফাৰ্নাণ্ডেজৰ এয়াৰ এছিয়াৰ সৈতে যৌথ উদ্যোগত এয়াৰ এছিয়া ইণ্ডিয়া আৰম্ভ কৰে। পিছলৈ ছিংগাপুৰ এয়াৰলাইন্সৰ সৈতে যৌথভাৱে আৰম্ভ কৰা হয় এয়াৰ ছাৰ্ভিচ কোম্পানী ‘ভিষ্টাৰ’।
