বিগ বছৰ নতুন ছিজনৰ আৰম্ভণিৰ পৰাই ধাৰাবাহিকতাত থকা প্ৰতিযোগীগৰাকী হৈছে ছাজিদ খান। ২০১৮ চনত ‘মি টু’ আন্দোলনৰ সময়তো তেওঁৰ বিৰুদ্ধে যৌন নিৰ্যাতনৰ অভিযোগ উত্থাপন হৈছিল। গতিকে তেওঁক এবছৰৰ বাবে পৰিচালনা সমিতিৰ পৰা নিলম্বন কৰা হয়।
এই সকলোবোৰৰ মাজতো বিগ বছৰ ঘৰত তেওঁৰ উপস্থিতিক লৈ সৰৱ চাৰ্লিন চোপ্ৰা। চাৰ্লিন চোপ্ৰা, ৰেচেল হোৱাইট, ছিমৰন ছুৰীৰ দৰে অভিনেত্ৰীয়ে ছাজিদক পৰ্দাত চাব নিবিচাৰে বুলি অভিযোগত স্বাক্ষৰ কৰে। দক্ষিণৰ অভিনেত্ৰী শীলা প্ৰিয়া শ্বেথে পুনৰ অভিযোগ উত্থাপন কৰিছে ছাজিদৰ বিৰুদ্ধে।
সংবাদ মাধ্যমৰ সূত্ৰ অনুসৰি, প্ৰায় ১৪ বছৰ পূৰ্বে ছাজিদে শীলাৰ লগত অসৎ আচৰণ কৰিছিল। সেই সময়ত শীলাই তামিল, কানাড়া, মালয়ালম ছবিত অভিনয় কৰিছিল। হিন্দী চলচ্চিত্ৰ পৰিচালক ছাজিদ খানৰ সৈতে যোগাযোগ হয়। শীলা তেওঁৰ ওচৰলৈ কাম বিচাৰি গৈছিল। কিন্তু সেই সময়ত ছাজিদৰ আচৰণ তেওঁৰ প্ৰতি ভাল নাছিল।
অভিনেত্ৰী শীলাই কয়, “তেওঁ মোৰ ব্যক্তিগত অংগবোৰলৈ চাই আছিল। বাৰে বাৰে মোৰ বক্ষযুগল চাই কয় যে মোৰ অস্ত্ৰোপচাৰৰ প্ৰয়োজন! মোৰ বক্ষযুগল বলীউডৰ বাবে উপযোগী নহয়। বক্ষযুগল ডাঙৰ কৰিবলৈ নিৰ্দিষ্ট ধৰণৰ তেল ব্যৱহাৰ কৰা উচিত। তেতিয়া মই বলীউডত কাম কৰাৰ সুযোগ পাম।”
কিছুদিন পূৰ্বে চাৰ্লিন চোপ্ৰাই ছাজিদৰ বিৰুদ্ধে আৰক্ষীক এজাহাৰ দাখিল কৰিছিল। চাৰ্লিনে ইয়াতেই ৰৈ নাথাকিল। কেন্দ্ৰীয় তথ্য আৰু সম্প্ৰচাৰ মন্ত্ৰী অনুৰাগ ঠাকুৰক ছাজিদৰ বিৰুদ্ধে অভিযোগ কৰে। লগতে এই অনুষ্ঠানৰ সম্প্ৰচাৰ বন্ধ কৰিবলৈ দাবী জনায়। অৱশ্যে তেওঁৰ অভিযোগ সন্তুষ্টিজনক নহʼল।
