তৃতীয় বিশ্বকাপৰ ফাইনেলত অৱতীৰ্ণ হ’ব লিঅ’নেল মেছি। ২০১৪ চনত আৰ্জেণ্টিনাৰ অধিনায়কগৰাকীয়ে জয়ৰ সোৱাদ নকৰিলেও ২০২২ চনত দেশখনক চেম্পিয়ন কৰি তুলিছিল। এইবাৰ মেছিয়ে একেৰাহে দুবাৰকৈ আৰ্জেণ্টিনাক চেম্পিয়ন কৰাৰ সুযোগ লাভ কৰিছে। এই দলীয় প্ৰদৰ্শনৰ উপৰি ১৯ জুলাইত ফ্ৰান্সৰ বিৰুদ্ধে অনুষ্ঠিত হ’বলগীয়া ফাইনেলত মেছিয়ে কমেও ১১টা ব্যক্তিগত অভিলেখ গঢ়াৰ সুযোগ পাব পাৰে।
কি এই অভিলেখ?
১) বিশ্বকাপৰ ফাইনেলৰ দিনা মেছিৰ বয়স হ’ব ৩৯ বছৰ আৰু ২৫ দিন। তেওঁ ইতিমধ্যে বিশ্বকাপৰ ফাইনেল খেলা আটাইতকৈ বয়সীয়াল ফুটবলাৰ হিচাপে অভিলেখ গঢ়িছে। মুঠতে বিশ্বকাপত খেলা আটাইতকৈ বয়সীয়াল খেলুৱৈজন হৈছে ইটালীৰ ডিনো জফ। ১৯৮২ চনৰ ফাইনেলত তেতিয়াৰ পশ্চিম জাৰ্মানীৰ বিৰুদ্ধে ৪০ বছৰ ১৩৩ দিন বয়সত খেলিছিল। জোফ অৱশ্যে আছিল এজন গ’লৰক্ষক। গ’লৰক্ষকৰ বাহিৰে মেছিয়ে ফাইনেল খেলা আটাইতকৈ বয়সীয়াল ফুটবলাৰ হিচাপে পৰিগণিত হ’ব।
২) ১৯ জুলাইত খেলপথাৰত নমাৰ সময়ত মেছিয়ে বিশ্বকাপৰ তিনিখন ফাইনেল খেলা বিশ্বৰ দ্বিতীয়জন ফুটবল অধিনায়ক হিচাপে পৰিগণিত হ’ব। কেৱল ব্ৰাজিলৰ প্ৰাক্তন অধিনায়ক কাফুৰহে এনে কৃতিত্ব আছে। তেওঁৰ নেতৃত্বত ব্ৰাজিলে ১৯৯৪, ১৯৯৮ আৰু ২০০২ চনৰ বিশ্বকাপৰ ফাইনেল খেলিছিল।
৩) মেছিয়ে আৰ্জেণ্টিনাৰ প্ৰথম অধিনায়ক হিচাপে তিনিখন বিশ্বকাপৰ ফাইনেলত দেশক নেতৃত্ব দিব। তেওঁ ডিয়েগো মাৰাডোনাৰ আদৰ্শক অতিক্ৰম কৰিব। মাৰাডোনাৰ নেতৃত্বত আৰ্জেণ্টিনাই দুবাৰকৈ বিশ্বকাপৰ ফাইনেল খেলিছিল।
৪) ইটালী (১৯৩৪, ১৯৩৮) আৰু ব্ৰাজিলৰ (১৯৫৮, ১৯৬২) কেইবাজনো ফুটবলাৰৰ দুবাৰকৈ বিশ্বকাপ জয় কৰাৰ উদাহৰণ আছে। আৰ্জেণ্টিনাৰ ডেনিয়েল পাছাৰেলাৰো এই কৃতিত্ব আছে। অৱশ্যে এইবাৰ যদি আৰ্জেণ্টিনা চেম্পিয়ন হ’ব পাৰে তেন্তে মেছিয়ে দুবাৰকৈ বিশ্বকাপ জয় কৰা প্ৰথমজন অধিনায়ক হিচাপে পৰিগণিত হ’ব।
৫) বিশ্বকাপত এতিয়ালৈকে মেছিয়ে ৮টা গ’ল কৰিছে। যদি তেওঁ ফাইনেলত গ’ল দিব পাৰে তেন্তে তেওঁ আন এক উদাহৰণ দাঙি ধৰিব। তেওঁ বিশ্বকাপৰ ফাইনেলত গ’ল দিয়া আটাইতকৈ বয়সীয়াল ফুটবলাৰ হিচাপে নজিৰ গঢ়ি তুলিব। এই অভিলেখ এতিয়া ছুইডেনৰ নিলছ লিডহলমৰ হাতত আছে। ১৯৫৮ চনৰ ফাইনেলত ব্ৰাজিলৰ বিৰুদ্ধে ৩৫ বছৰ ২৬৪ দিন বয়সত গ’ল দিছিল।
৬) স্পেইনৰ বিৰুদ্ধে যদি মেছিয়ে ফাইনেলত গ’ল দিব পাৰে তেন্তে তেওঁ আন এক অভিলেখ গঢ়িব। বিশ্বকাপত আৰ্জেণ্টিনাৰ ফুটবলাৰ এজনে সৰ্বাধিক গ’ল দিয়াৰ অভিলেখ গঢ়িব। ১৯৩০ চনৰ বিশ্বকাপত আৰ্জেণ্টিনাৰ হৈ গুইলাৰমো ষ্টেবিলে ৮টা গ’ল দিছিল। সেই ৯৬ বছৰীয়া অভিলেখ অতিক্ৰম কৰাৰ সুযোগ আছে মেছিৰ হাতত।
৭) বিশ্বকাপৰ ফাইনেলত যদি তেওঁ দুটা গ’ল কৰে তেন্তে তেওঁ আন এক অভিলেখ গঢ়িব। মেছি বিশ্বৰ চতুৰ্থজন ফুটবলাৰ হিচাপে পৰিগণিত হ’ব আৰু ইউৰোপৰ বাহিৰত বিশ্বকাপত ১০টা বা তাতকৈ অধিক গ’ল দিয়া প্ৰথমজন ফুটবলাৰ হিচাপে পৰিগণিত হ’ব। ১৯৫৮ চনৰ বিশ্বকাপত ফ্ৰান্সৰ জাষ্ট ফটেনে ১৩টা গ’ল দিছিল। যিটো এতিয়াও বিশ্ব অভিলেখ। ইয়াৰ উপৰি ১৯৫৪ চনৰ বিশ্বকাপত হাংগেৰীৰ চেণ্ডাৰ কছিছে ১১টা গ’ল আৰু ১৯৭০ চনত পশ্চিম জাৰ্মানীৰ হৈ গেৰ্ড মুলাৰে ১০টা গ’ল দিছিল।
৮) ১৯ জুলাইত যদি মেছিয়ে গ’ল দিয়ে তেন্তে তেওঁ বিশ্বকাপৰ দুখন ফাইনেলত গ’ল দিয়া বিশ্বৰ ষষ্ঠজন ফুটবলাৰ হিচাপে পৰিগণিত হ’ব। ২০২২ চনৰ বিশ্বকাপৰ ফাইনেলত ফ্ৰান্সৰ বিৰুদ্ধে মেছিয়ে দুটা গ’ল দিছিল। ব্ৰাজিলৰ ভাভা, পেলে, জাৰ্মানীৰ পল ব্ৰেইটনাৰ, ফ্ৰান্সৰ জিনেদিন জিদান আৰু কাইলিয়ান এমবাপেৰ এনে কৃতিত্ব আছে।
৯) যদি মেছিয়ে ফাইনেলত গ’ল দি আৰ্জেণ্টিনাক চেম্পিয়ন কৰে তেন্তে তেওঁ আন এক নজিৰ গঢ়ি তুলিব। তেওঁ বিশ্ব চেম্পিয়ন দলৰ ফুটবলাৰ হিচাপে সৰ্বাধিক গ’ল দিয়া বিশ্বৰ প্ৰথমজন ফুটবলাৰ হিচাপে পৰিগণিত হ’ব। এই অভিলেখ ব্ৰাজিলৰ ৰোনাল্ডোৰ নামত আছে। ২০০২ চনৰ বিশ্বকাপত ব্ৰাজিলে জয়লাভ কৰে। সেইবাৰ ৰোনাল্ডোৱে ৮টা গ’ল দিছিল।
১০) যোৱা বিশ্বকাপৰ ফাইনেলত মেছিৰ নামত আছিল দুটা গ’ল। এইবাৰৰ ফাইনেলত যদি তেওঁ আৰু দুটা গ’ল দিয়ে তেন্তে তেওঁ এমবাপেৰ অভিলেখত উপনীত হ’ব। বিশ্বকাপৰ ফাইনেলত চাৰিটা গ’লেৰে সৰ্বাধিক গ’ল দিছে এমবাপেয়ে। বাৰ্চিলোনাৰ প্ৰাক্তন খেলুৱৈগৰাকীয়ে যদি স্পেইনৰ বিৰুদ্ধে হেট্ৰিক অৰ্জন কৰে তেন্তে তেওঁ গঢ়ি তুলিব এক নতুন বিশ্ব অভিলেখ। বিশ্বকাপৰ ফাইনেলত তেওঁৰ গ’লৰ সংখ্যা পাঁচটা হ’ব৷
১১) যদি আৰ্জেণ্টিনা জয়ী হয় তেন্তে বিশ্ব ফুটবল খিতাপ অক্ষুণ্ণ ৰখা বিশ্বৰ তৃতীয়খন দেশ হিচাপে পৰিগণিত হ’ব। ব্ৰাজিল (১৯৫৮, ১৯৬২) আৰু ইটালীয়ে (১৯৩৪, ১৯৩৮) একেৰাহে দুবাৰকৈ বিশ্বকাপ জয় কৰিবলৈ সক্ষম হৈছে। একেৰাহে দুবাৰকৈ বিশ্বকাপ জয় কৰা বিশ্বৰ আটাইতকৈ বয়সীয়াল ফুটবলাৰ হিচাপে পৰিগণিত হ’ব মেছি। এই অভিলেখ বৰ্তমান ব্ৰাজিলৰ নিল্টন ছাণ্টোছৰ নামত। ১৯৬২ চনত ব্ৰাজিলে একেৰাহে দ্বিতীয়বাৰৰ বাবে বিশ্বকাপ জয় কৰাৰ সময়ত ছাণ্টোছৰ বয়স আছিল ৩৭ বছৰ। ১৯৫৮ চনৰ চেম্পিয়ন দলৰ সদস্যও আছিল ছাণ্টোছ।
