প্ৰধানমন্ত্ৰী নৰেন্দ্ৰ মোদীয়ে (Narendra Modi) শুকুৰবাৰে ভাৰতৰ প্ৰথমখন হাইড্ৰ’জেনচালিত ৰে’ল (First hydrogen-powered rail)ৰ যাত্ৰাৰ শুভাৰম্ভ কৰে। হাৰিয়ানাৰ জিন্দ ৰে’লৱে ষ্টেচন (Haryana’s Jind railway station)ৰ পৰা সেউজ পতাকা উৰুৱাই (Waving green flag) পৰিৱেশ অনুকূল ৰে’লখনৰ প্ৰথমটো যাত্ৰাৰ সূচনা কৰে প্ৰধানমন্ত্ৰীয়ে। হাৰিয়ানাৰ জিন্দ আৰু শোনিপাটৰ মাজত চলিব এই ৰে’ল। ইয়াৰ লগে লগে ভাৰতে হাইড্ৰ’জেনচালিত ৰে’ল চলাচল কৰা দেশৰ তালিকাত যোগদান কৰে।
প্ৰধানমন্ত্ৰীয়ে শুকুৰবাৰে জিন্দৰ একলব্য ষ্টেডিয়ামত প্ৰায় ১৪,৭০০ কোটি টকাৰ বিভিন্ন উন্নয়নমূলক প্ৰকল্পৰ আধাৰশিলা স্থাপনৰ লগতে উদ্বোধন কৰে। ভাষণ প্ৰসংগত তেওঁ এনডিএ চৰকাৰৰ দিনত বিভিন্ন উন্নয়নমূলক কাৰ্যসূচীৰ বিষয়ে কয়। শেহতীয়াকৈ ইৰাণ যুদ্ধ আৰু হৰমুজ প্ৰণালীৰ সংকটৰ কথাও তেওঁৰ ভাষণত ওলায়।
প্ৰধানমন্ত্ৰীয়ে কয়, “যুদ্ধৰ পৰিস্থিতিতো তেলৰ সংকট হৈছিল, কিন্তু আমাৰ কোনো উন্নয়নমূলক প্ৰকল্পতে ব্যাঘাত জন্মাব পৰা নাছিল। ২০১৪ চনৰ আগতে হৰমুজৰ সংকট হ’লে ৰে’ল সেৱা বন্ধ হৈ গ’লহেঁতেন!” মোদীয়ে আঙুলিয়াই দিয়ে যে পূৰ্বৰ ইউপিএ চৰকাৰৰ সময়ত ইন্ধন সংৰক্ষণ আৰু যোগানৰ বিষয়টো অৱহেলিত হৈছিল। প্ৰধানমন্ত্ৰীয়ে হাইড্ৰ’জেন ৰে’লখনক ‘মে’ক ইন ইণ্ডিয়া’ৰ উৎকৃষ্ট উদাহৰণ হিচাপেও ব্যক্ত কৰে।
হাইড্ৰ’জেন ৰে’লৰ লগতে শুকুৰবাৰে প্ৰধানমন্ত্ৰীয়ে জিন্দৰ একলব্য ষ্টেডিয়ামৰ পৰা কুৰুক্ষেত্ৰলৈ নিৰ্মিত উচ্চ ৰে’লপথটো দেশৰ বাবে উৎসৰ্গা কৰে। ইয়াৰ সমান্তৰালকৈ তেওঁ ১২,৪৭০ কোটি টকাৰ ৰাষ্ট্ৰীয় ঘাইপথ সম্প্ৰসাৰণ প্ৰকল্পৰ উদ্বোধন আৰু আধাৰশিলা স্থাপন কৰে। ভীৱানীৰ ‘পণ্ডিত নেকীৰাম শৰ্মা চৰকাৰী চিকিৎসা মহাবিদ্যালয়’ আৰু মহেন্দ্ৰগড়ৰ কোৰিৱাছৰ ‘মহৰ্ষি চাৱন চিকিৎসা মহাবিদ্যালয়’ আৰু ‘ৰাও তুলাৰাম চিকিৎসালয়’ হাৰিয়ানাৰ ৰাইজৰ বাবে উৎসৰ্গা কৰে। উল্লেখ্য যে হাৰিয়ানাৰ চুবুৰীয়া ৰাজ্য পঞ্জাবত প্ৰায় সাত মাহ পিছত বিধানসভা নিৰ্বাচন অনুষ্ঠিত হ’ব। ইয়াৰ পূৰ্বে শুকুৰবাৰে মোদীয়ে ইণ্টাৰনেটৰ জৰিয়তে কুৰুক্ষেত্ৰত ‘শিখ সংগ্ৰহালয়’ৰ আধাৰশিলা স্থাপন কৰি শিখ ধৰ্মৰ ইতিহাস আৰু আধুনিক প্ৰযুক্তিৰ সহায়ত গুৰুসকলৰ অৱদানৰ ওপৰত আলোকপাত কৰে।
