দেশৰ বিভিন্ন প্ৰান্তত দুটা কেন্দ্ৰীয় সংস্থাই তদন্ত কৰি আছে বিভিন্ন দুৰ্নীতিৰ গোচৰ। অৱশ্যে বিৰোধীয়ে অভিযোগ কৰিছে যে মোডী চৰকাৰে কেৱল অ-বিজেপিশাসিত ৰাজ্যসমূহতহে এই সংস্থাটোক ৰাজনৈতিক উদ্দেশ্যত ব্যৱহাৰ কৰিছে। এই প্ৰসংগতেই পোহৰলৈ আহিছিল ৰাষ্ট্ৰীয় অনুসন্ধান সংস্থা (NIA)ৰ অভিযান।
সংবাদ মাধ্যমৰ সূত্ৰ অনুসৰি, সোমবাৰে সমগ্ৰ দেশৰ কমেও ৬০টা স্থানত কেন্দ্ৰীয় চোৰাংচোৱাই অভিযান চলাই আছে। সূত্ৰ অনুসৰি এই পদক্ষেপ বিভিন্ন অপৰাধী গেং আৰু ছিণ্ডিকেট ভাঙিবলৈ লোৱা হৈছে। কুখ্যাত অপৰাধী নীৰজ বাৱানা আৰু লৰেন্স বিষ্ণয়ৰ চক্ৰটোৰ বিভিন্ন সদস্যৰ বিৰুদ্ধে ইতিমধ্যে NIA ১০টা গোচৰ ৰুজু কৰিছে।
মন কৰিবলগীয়া যে দেশৰ কুখ্যাত অপৰাধীৰ তালিকাত নীৰজ আৰু লৰেন্সৰ নাম শীৰ্ষত আছে। শেহতীয়াকৈ পঞ্জাৱী কণ্ঠশিল্পী সিদ্ধু মুছেৱালাৰ হত্যাকাণ্ডৰ মূল ষড়যন্ত্ৰকাৰী হিচাপে তেওঁলোকৰ নাম উত্থাপন হৈছে।
ৰাজস্থানৰ পৰা আৰক্ষীয়ে গ্ৰেপ্তাৰ কৰে লৰেন্সক। ইয়াৰ পিছত তেওঁক দিল্লী আৰক্ষীৰ জিম্মাত ৰখা হৈছে। বিগত ১০ বছৰ ধৰি হাৰিয়ানা, পঞ্জাব, ৰাজস্থান, মহাৰাষ্ট্ৰ, হিমাচল প্ৰদেশত ইটোৰ পিছত সিটো অপৰাধত তেওঁৰ নাম জড়িত হৈ আছে। আনহাতে নীৰজ দিল্লীৰ কুখ্যাত অপৰাধী হিচাপে পৰিচিত।
কিন্তু বিষ্ণয়ৰ দলটোৰ সকলো সময়তে তেওঁৰ দলৰ লগত কাজিয়া হয়। এই দুটা গেঙৰ কমৰ ভাঙিবলৈ NIA য়ে বিভিন্ন স্থানত তালাচী চলাই আছে। সূত্ৰ অনুসৰি এতিয়া দিল্লী, হাৰিয়ানা, উত্তৰ প্ৰদেশ আৰু পঞ্জাৱৰ চোৰাংচোৱাই অভিযান চলাই আছে। অৱশ্যে এতিয়ালৈকে কোনো লোকক গ্ৰেপ্তাৰ বা আটক কৰাৰ খবৰ পোৱা নাই।
সূত্ৰ অনুসৰি, ভাৰত আৰু বিদেশৰ বিভিন্ন কাৰাগাৰৰ ভিতৰৰ পৰা বিভিন্ন অপৰাধ সংঘটিত হৈ আছে। এনেধৰণৰ গেঙক দমন কৰাত সক্ৰিয় হৈ আহিছে NIA। ইয়াৰ ভিতৰত আছে গোল্ডি ব্ৰাৰৰ দৰে গেংষ্টাৰ, যাৰ গেঙৰ সদস্যসকল কানাডাৰ পৰা সিদ্ধু মুছেৱালাৰ হত্যাকাণ্ডৰ সমন্বয়ৰ সৈতে জড়িত আছিল বুলি অভিযোগ উঠিছে।
