ষ্টাফ ৰিপ’ৰ্টাৰ
সুৰাপান কৰি গাড়ী চলাই গুৱাহাটী জিএছৰোডত ৮ জনকৈ শ্ৰমিকক মহতিয়াই নিয়া মডেল ৰাজকন্যা বৰুৱা গ্ৰেপ্তাৰ। মেডিকেল বৰ্ডৰ স্বাস্থ্য পৰীক্ষাৰ প্ৰতিবেদনৰ পাছতে দিছপুৰ আৰক্ষীয়ে গ্ৰেপ্তাৰ কৰিছে ৰাজকন্যাক। উল্লেখ্য যে জিএনআৰচি চিকিৎসালয়ত অসুস্থতা দোহাই দি বিগত দুদিন ধৰি ভৰ্তি হৈ আছিল মডেলগৰাকী। আৰক্ষীয়ে চমন জাৰি কৰাৰ পাছতো অসুস্থতাত দোহাই দি মঙলবাৰে দিছপুৰ থানাত সাজু হোৱা নাছিল মডেলগৰাকী। তাৰ পাছতে গুৱাহাটীৰ মেডিকেল কলেজ হাস্পতালৰ চিকিৎসকক লৈ গঠন কৰিছিল ৬জনীয়া মেডিকেল বোৰ্ড। বুধবাৰে বোৰ্ডে জিএনআৰচিৰ আইচিইউত ভৰ্তি হৈ থকা ৰাজকন্যাৰ স্বাস্থ্য পৰীক্ষা কৰে। বোৰ্ডৰ পৰীক্ষাত ৰাজকন্যাৰ দেহত ধৰা নপৰিল কোনো অসুস্থতা। জিএনআৰচিৰ আইচিইউত ভৰ্তি হৈ থাকিব পৰা কোনোৱে আঘাত নাই ৰাজকন্যা বৰুৱাৰ। আইচিইউত ভৰ্তি হ’বলগা কোনো অসুস্থতা নাই। মেডিকেল বোৰ্ডৰ প্ৰতিবেদন এই কথা প্ৰকাশ পোৱা পাছতে দিছপুৰ আৰক্ষীয়ে গ্ৰেপ্তাৰ কৰে অসুস্থতাৰ অভিনয় কৰা মডেলগৰাকীক।
চিকিৎসালয়ৰ পৰা ৰাজকন্যাক ইতিমধ্যে দিছপুৰ আৰক্ষীয়ে নিজ জিম্মালৈ আনিছে।
আনহাতে, মডেল ৰাজকন্যাক আইচিইউত ৰক্ষণাবেক্ষণ দিয়া জিএনআৰচি কৰ্তৃপক্ষও তদন্তৰ আওতালৈ আহিব।
উল্লেখ্য যে শুকুৰবাৰে নিশা সুৰাপান কৰি গাড়ী চলাই মহতিয়াই নিছিল শ্ৰমিকক। শনিবাৰে গুৰুত্ব অপৰাধ কৰিও লাভ কৰিছিল জামিন। তাৰ পাচতে সমগ্ৰ বিষয়তো সামাজিক মাধ্যমত চৰ্চা হোৱাত মুখ্যমন্ত্ৰী ডঃ হিমন্ত বিশ্ব শৰ্মাৰ হস্তক্ষেপত পুনৰ আৰক্ষীয়ে গ্ৰেপ্তাৰ কৰিবলৈ বাধ্য হয় মডেলৰাকীক।
