ম্যানমাৰে আশ্বাস দিছে যে ভাৰতৰ নিৰাপত্তা স্বাৰ্থবিৰোধী কোনো কামৰ বাবে নিজৰ ভূখণ্ড (India Myanmar ties) ব্যৱহাৰ কৰিব দিয়া নহ’ব। সোমবাৰে নতুন দিল্লীত ম্যানমাৰৰ ৰাষ্ট্ৰপতি মিন আং হিলিং আৰু প্ৰধানমন্ত্ৰী নৰেন্দ্ৰ মোদীৰ মাজত অনুষ্ঠিত দ্বিপাক্ষিক বৈঠকৰ সময়ত এই প্ৰতিশ্ৰুতি দিয়া হয়।
ম্যানমাৰৰ সামৰিক সমৰ্থিত চৰকাৰৰ ৰাষ্ট্ৰপতি তথা প্ৰাক্তন সেনাপ্ৰধান হিলিঙে সোমবাৰে মোদীৰ আমন্ত্ৰণত পাঁচদিনীয়া ভ্ৰমণসূচীৰে ভাৰতত উপস্থিত হয়।
মোদীৰ সৈতে দ্বিপাক্ষিক বৈঠকৰ সমান্তৰালকৈ তেওঁ বিহাৰৰ বোধগয়াও ভ্ৰমণ কৰিব। উল্লেখ্য যে দেশখনত বিৰোধী ৰাজনৈতিক দল অবিহনে অনুষ্ঠিত বিতৰ্কিত নিৰ্বাচনত (২০২৫ চনৰ ডিচেম্বৰ-২০২৬ জানুৱাৰী) জয়লাভ কৰাৰ পিছত এইটোৱেই হিলিঙৰ প্ৰথম বিদেশ ভ্ৰমণ। তাৎপৰ্যপূৰ্ণভাৱে তেওঁ চীনক বাছি লোৱাৰ পৰিৱৰ্তে ভাৰতক প্ৰথম গন্তব্যস্থান হিচাপে বাছি লৈছে।
মোদী-হিলিঙৰ বৈঠকৰ অন্তত সোমবাৰে বৈদেশিক সচিব বিক্ৰম মিছৰীয়ে কয়, “দুয়োগৰাকী নেতাই বাণিজ্য আৰু অৰ্থনৈতিক সম্পৰ্ক, প্ৰতিৰক্ষা আৰু নিৰাপত্তাৰ বিষয়, সীমান্ত ব্যৱস্থাপনা, উন্নয়ন সাহায্য আৰু আঞ্চলিক পৰিস্থিতিকে ধৰি বহুতো দ্বিপাক্ষিক বিষয়ত আলোচনা কৰে।”
লগতে তেওঁ কয় যে দুয়োগৰাকী নেতাই বাণিজ্য, প্ৰতিৰক্ষা আৰু শক্তি খণ্ডত দ্বিপাক্ষিক সম্পৰ্ক শক্তিশালী কৰাৰ বিষয়ে আলোচনা কৰে। উল্লেখ্য, ম্যানমাৰৰ ৰাষ্ট্ৰপতিৰ সৈতে এটা উচ্চ পৰ্যায়ৰ প্ৰতিনিধি দলো ভাৰতত উপস্থিত হৈছে। ইয়াৰ ভিতৰত দেশখনৰ মন্ত্ৰী, উচ্চ পদস্থ চৰকাৰী বিষয়া আৰু ব্যৱসায়ীসকলো অন্তৰ্ভুক্ত আছে।
