ভাৰতলৈ উভতি আহি আছে ক’কৰোচ জনতা পাৰ্টীৰ (Cockroach Janata Party) প্ৰতিষ্ঠাপক অভিজিৎ দীপক। NEET-UG প্ৰশ্নকাকত ফাদিল কাণ্ডৰ প্ৰতিবাদত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত দিল্লীৰ যন্তৰ-মন্তৰত শান্তিপূৰ্ণ প্ৰতিবাদী কাৰ্যসূচীত অংশগ্ৰহণ কৰিবলৈ তেওঁ ভাৰতলৈ উভতি আহিব। ৬ জুনত এই প্ৰতিবাদী কাৰ্যসূচীৰ আহ্বান জনোৱা হৈছে।
শেহতীয়াকৈ উচ্চতম ন্যায়ালয়ৰ মুখ্য ন্যায়াধীশ সূৰ্য কান্তে দেশৰ যুৱক-যুৱতীসকলৰ এটা অংশক ‘পঁইতাচোৰা’ আৰু ‘পৰজীৱী’ বুলি অভিহিত কৰাৰ পিছতে এক বিতৰ্কৰ সৃষ্টি হয়। মুখ্য ন্যায়াধীশগৰাকীৰ মতে, কোনো বৃত্তিত স্থান বিচাৰি উলিয়াব নোৱাৰা এই যুৱক-যুৱতীসকলে সাংবাদিক, ছ’চিয়েল মিডিয়া ব্যৱহাৰকাৰী বা আৰ টি আই কৰ্মী হিচাপে কাম কৰিবলৈ আৰম্ভ কৰে আৰু সকলোকে আক্ৰমণ কৰে।
মুখ্য ন্যায়াধীশৰ মন্তব্যৰ পিছতে ১৬ মে’ত চিজেপিয়ে আত্মপ্ৰকাশ কৰে। চিজেপিয়ে ‘অনলাইন চেটায়াৰ মুভমেণ্ট’ (ব্যংগাত্মক ৰাজনৈতিক আন্দোলন) হিচাপে যাত্ৰা আৰম্ভ কৰাৰ কেইদিনমানৰ ভিতৰতে ইণ্টাৰনেটত অপৰিসীম জনপ্ৰিয়তা লাভ কৰে।
এই পঁইতাচোৰা দলৰ আঁৰত আছে বষ্টনস্থিত প্ৰযুক্তিবিদ অভিজিত। অনলাইন জগতত যেতিয়া তেওঁৰ দলৰ জনপ্ৰিয়তা বাঢ়িছিল, তেতিয়া পোহৰলৈ আহিছিল নীট প্ৰশ্নকাকত ফাদিলৰ বিষয়টো। এই সন্দৰ্ভত দেশজুৰি আৰম্ভ হয় এক আন্দোলন। অভিজিতেও উক্ত আন্দোলনক সমৰ্থন কৰিছিল। লগতে নীট আন্দোলনত প্ৰতিবাদকাৰীৰ কাষত থিয় দিবলৈ দেশলৈ উভতি আহিব বুলিও কয়।
কেৱল সেয়াই নহয়, কেন্দ্ৰীয় শিক্ষামন্ত্ৰীগৰাকীৰ পদত্যাগৰো দাবী জনায়। এক্স হেণ্ডেলত এক ভিডিঅ’ মেছেজত অভিজিতে কয়, “এতিয়া ভাৰতৰ সংবিধানৰ পথ অনুসৰণ কৰি আমি সকলোৱে একত্ৰিত হোৱাৰ সময়। আমি শান্তিপূৰ্ণভাৱে ধৰ্মেন্দ্ৰ প্ৰধানৰ পদত্যাগৰ বাবে মাত মাতিব লাগিব।”
ধৰ্মেন্দ্ৰৰ পদত্যাগৰ দাবীত ৮ লাখৰো অধিক ছাত্ৰ-ছাত্ৰীয়ে অনলাইন আবেদনত স্বাক্ষৰ কৰা বুলি উল্লেখ কৰি অভিজিতে কয়, “লক্ষ্ণৌ, জয়পুৰ, মহাৰাষ্ট্ৰকে ধৰি দেশৰ বিভিন্ন প্ৰান্তত প্ৰতিবাদৰ জৰিয়তে এই আন্দোলনক সমৰ্থন কৰা দেখা গৈছে।”
NEET, CBSE, CWT-ত হোৱা বিভ্ৰান্তিৰ কথা উল্লেখ কৰি অভিজিতে কয়, “ইমান ডাঙৰ ভুলৰ পিছত শিক্ষামন্ত্ৰীয়ে যদি পদত্যাগ নকৰে তেন্তে ইয়াৰ অৰ্থ হ’ল এই দেশত আৰু জবাবদিহিতা নাই।” তেওঁ লগতে কয়, “প্ৰতিষ্ঠানিক বিফলতাৰ বাবে মূলতঃ ছাত্ৰ-ছাত্ৰীসকলেই ক্ষতিগ্ৰস্ত হয়।”
অভিজিতে ৬ জুনত দিল্লীলৈ আহি যন্তৰ-মন্তৰত শান্তিপূৰ্ণ প্ৰতিবাদ সাব্যস্ত কৰিবলৈ আৰক্ষীৰ পৰা অনুমতি ল’ব বুলি জানিবলৈ দিয়ে। আন্দোলনত হিংসাৰ কোনো স্থান নাই।
তেওঁ লগতে কয়, “মোৰ বন্ধু-বান্ধৱ আৰু পৰিয়ালৰ লোকে গ্ৰেপ্তাৰ হ’বলৈ ভয় কৰে। কিন্তু মই এতিয়াও বিশ্বাস কৰোঁ যে আমাৰ দেশ গণতান্ত্ৰিক। তাত মোক শান্তিপূৰ্ণভাৱে প্ৰতিবাদ কৰিবলৈ দিয়া হ’ব। মই স্পষ্টকৈ ক’ব বিচাৰো যে মই গান্ধীজী, আম্বেদকাৰ, ভগত সিঙৰ ডাঙৰ অনুৰাগী। মই সকলোতকৈ বেছি ভাৰতৰ সংবিধানত বিশ্বাস কৰোঁ। সংবিধানে আমাক সকলোকে কথা কোৱাৰ অধিকাৰ দিয়ে।”
অৱশ্যে গ্ৰেপ্তাৰৰ ভয়ো নুই কৰা নাই অভিজিতে। তেওঁ লগতে কয়, “আমি কিমান দিন ভয়ত জীয়াই থাকিম? এই দেশ কোনো এটা দলৰ নহয়। দেশ আমাৰ সকলোৰে। এয়া আমাৰ ভৱিষ্যতৰ প্ৰশ্ন।
আমাৰ ভৱিষ্যত ধ্বংস হৈ আছে। আমাৰ দায়িত্ব হ’ল এই দেশত কাৰোবাৰ অন্যায় হ’লে গণতান্ত্ৰিকভাৱে অতি শান্তিপূৰ্ণভাৱে প্ৰতিবাদ কৰা।” অভিজিতে লগতে কয় যে শেহতীয়াকৈ তেওঁ আমেৰিকাৰ পৰা কেইবাটাও চাকৰিৰ প্ৰস্তাৱ লাভ কৰিছে। অৱশ্যে ভাৰতলৈ ঘূৰি অহাৰ সিদ্ধান্ত লৈছে। কাৰণ তেওঁ দেশৰ বাবে অৱদান আগবঢ়াব বিচাৰে।
