জাতীয় গীত ‘বন্দে মাতৰম’ বিতৰ্কক (‘Vande Mataram’ controversy) লৈ এতিয়া কেৰালা বিধানসভাত (Kerala Legislative Assembly) ৰাজনৈতিক উষ্ণতা চৰম সীমাত উপনীত হৈছে। মুখ্যমন্ত্ৰী ভি ডি সতীশনৰ নেতৃত্বত নৱগঠিত ইউডিএফ চৰকাৰৰ এক কাৰ্যক লৈ বিতৰ্কই এনে এটা পৰ্যায় পাইছেগৈ যে এতিয়া ই কংগ্ৰেছ, চিপিআই(এম) আৰু বিজেপিৰ মাজত এক বৃহৎ মতাদৰ্শগত যুদ্ধলৈ পৰিণত হৈছে। ৰাজ্যপাল ৰাজেন্দ্ৰ আৰ্লেকাৰৰ উপস্থিতিত বিধানসভা অনুষ্ঠানত ‘বন্দে মাতৰম’ৰ এটা অংশহে গোৱা হৈছিল, যাক লৈ এতিয়া বিতৰ্কৰ সৃষ্টি কৰিছে।
এই ঘটনাক লৈ খোদ ৰাজ্যপাল ৰাজেন্দ্ৰ আৰ্লেকাৰে তীব্ৰ ক্ষোভ প্ৰকাশ কৰিছে। তেওঁৰ স্পষ্ট বক্তব্য যে য’তেই ৰাজ্যপাল উপস্থিত থাকে তাতেই প্ৰট’কল অনুসৰি সমগ্ৰ ‘বন্দে মাতৰম’ গোৱা বা বজোৱা উচিত। ইয়াত সেই নিয়ম উলংঘা কৰা হৈছে। এই ঘটনা সংঘটিত হোৱাৰ লগে লগে বিধানসভাৰ অধ্যক্ষৰ ওচৰত আপত্তি দাখিল কৰা বুলিও ৰাজ্যপালে কয়।
ৰাজ্যপালৰ আপত্তিৰ পিছত কেৰালাৰ প্ৰাক্তন মুখ্যমন্ত্ৰী তথা এল ডি এফ নেতা পিনাৰায় বিজয়নে বিতৰ্কত ইন্ধন যোগায়। তেওঁ প্ৰত্যক্ষভাৱে আৰএছএছক লক্ষ্য কৰি কয় যে আৰএছএছে প্ৰট’কলৰ নামত নিজৰ এজেণ্ডা জাপি দিবলৈ চেষ্টা কৰিছে। সংবাদমেলত বিজয়নে স্পষ্টকৈ কয় যে সমগ্ৰ ‘বন্দে মাতৰম’ গোৱাৰ প্ৰয়োজন নাই। আৰএছএছৰ এজেণ্ডাৰ সন্মুখত কেৰালাই শিৰ নত নকৰে। ইয়াতেই বিতৰ্কৰ অন্ত নপৰে, গানটো বাজি থকাৰ সময়ত থিয় হৈ থকাৰ ক্ষেত্ৰতো তেওঁ প্ৰশ্ন উত্থাপন কৰে। বিজয়নে কয় যে ‘বন্দে মাতৰম’ বজোৱাৰ সময়ত থিয় হোৱাৰ কোনো আইনী বাধ্যবাধকতা নাই। অৱশ্যে যিহেতু সকলোৱে অনুষ্ঠানত থিয় দিছিল, সেয়েহে তেওঁলোকো থিয় হ’বলৈ বাধ্য হৈছিল।
ইফালে এই ঘটনাক লৈ বিজেপিয়ে কংগ্ৰেছ আৰু ইউডিএফ চৰকাৰক তীব্ৰ আক্ৰমণ চলাইছে। কেৰালা বিজেপিৰ নেতা ভি মুৰলীধৰণে ক্ষোভ প্ৰকাশ কৰি কয় যে ৰাজ্যপালৰ উপস্থিতিত সমগ্ৰ গীতটো গোৱাৰ বাবে কেন্দ্ৰই স্পষ্ট নিৰ্দেশ দিয়াৰ পিছতো কেৰালা বিধানসভাত ইয়াক গ্ৰহণ কৰা হোৱা নাছিল। এয়া কেৱল ৰাজ্যপাল বা ৰাজভৱনক অপমান কৰাই নহয়, ১৫০ বছৰ ধৰি চলি অহা আমাৰ জাতীয় গীতৰ অপমানো। জামাত-ই-ইছলামী আৰু চিপিআই(এম)ৰ দৰে দলক সন্তুষ্ট কৰিবলৈ ৰাজ্য চৰকাৰে এই কাম কৰা বুলি অভিযোগ কৰে মুৰলীধৰণে। কংগ্ৰেছক আক্ৰমণ কৰি তেওঁ প্ৰশ্ন উত্থাপন কৰে যে ১৮৯৬ চনত ৰাষ্ট্ৰীয় কংগ্ৰেছৰ অধিৱেশনত প্ৰথমবাৰৰ বাবে ‘বন্দে মাতৰম’ গোৱা কংগ্ৰেছে আজি এই গীতটোক লৈ হঠাতে কিয় অস্বস্তি অনুভৱ কৰিছে সেই বিষয়ে মুখ্যমন্ত্ৰী ভি ডি সতীশনে স্পষ্ট কৰা উচিত। তেওঁ লগতে উল্লেখ কৰে যে বিজেপিয়ে জাতীয় ঐতিহ্যক কৰা এই অপমানক তীব্ৰ ভাষাৰে গৰিহণা দিছে।
