ৰাষ্ট্ৰীয় ঔষধ মূল্য নিৰ্ধাৰণ (Medicine price hike) কৰ্তৃপক্ষই বজাৰত ৩০ বিধ ঔষধৰ খুচুৰা মূল্য নিৰ্ধাৰণ কৰিছে। এই তালিকাত হৃদৰোগৰ ঔষধৰ পৰা আৰম্ভ কৰি এণ্টিবায়টিক, মধুমেহৰ ঔষধ, ভিটামিন পৰিপূৰকলৈকে বিভিন্ন ঔষধ সন্নিবিষ্ট কৰা হৈছে। শেহতীয়াকৈ ৰাসায়নিক আৰু সাৰ মন্ত্ৰালয়ৰ অধীনস্থ ঔষধ বিভাগে এই সন্দৰ্ভত এক অধিসূচনা জাৰি কৰিছে।
বিভিন্ন ঔষধ প্ৰস্তুতকাৰী কোম্পানীয়ে প্ৰস্তুত কৰা ঔষধৰ খুচুৰা মূল্য উক্ত কোম্পানীসমূহৰ নাম উল্লেখ কৰি নিৰ্ধাৰণ কৰা হৈছে। এই অধিসূচনা অনুসৰি ‘ফাৰ্মা চিন্থ ফৰ্মুলেচনছ’ৰ দ্বাৰা নিৰ্মিত ক’লেকেলচিফেৰল অৰেল ছলিউচনৰ (৬০,০০০ আই ইউ) মূল্য প্ৰতি মিলিলিটাৰত ১৫.৮৮ টকা নিৰ্ধাৰণ কৰা হৈছে।
একেদৰে তিৰুপতি মেডিকেয়াৰে প্ৰস্তুত কৰা ভিটামিন ডি ৩ অৰেল ছলিউচনৰ (৬০,০০০ আই ইউ) মূল্য প্ৰতি মিলিলিটাৰত ১৪.৯১ টকা নিৰ্ধাৰণ কৰা হৈছে। ভিটামিন ডি ৩ ঔষধৰ উপৰি এনপিপিএয়ে কেলচিয়াম, মিথাইলকোবালামিন, এল-মিথাইলফ’লেট কেলচিয়াম আৰু পাইৰিড’ক্সেল-৫ যুক্ত ঔষধৰ মূল্যও নিৰ্ধাৰণ কৰিছে। সাধাৰণতে হাড়ৰ ক্ষয়, ভিটামিনৰ অভাৱ আৰু স্নায়ুৰ সমস্যা ৰোধৰ বাবে এই ঔষধ দিয়া হয়।
ইয়াৰ উপৰি শৰীৰত লিপিডৰ মাত্ৰা বজাই ৰাখিবলৈ ব্যৱহাৰ কৰা Atorvastatin আৰু Fenofibrate টেবলেটৰ মূল্য ১৮.৪৬ টকাকৈ নিৰ্ধাৰণ কৰা হৈছে। এলাৰ্জীৰ চিকিৎসাত ব্যৱহাৰ কৰা বিলাষ্টিন আৰু মণ্টেলুকাষ্ট টেবলেট ২১.২২ টকাকৈ নিৰ্ধাৰণ কৰা হৈছে। ৰক্তচাপ আৰু হৃদৰোগৰ চিকিৎসাত ব্যৱহাৰ কৰা বাইছ’প্ৰ’লল ফুমেৰেট আৰু এম্লোডিপিন টেবলেটৰো মূল্য ৯.৪০ টকাকৈ নিৰ্ধাৰণ কৰা হৈছে। ইয়াৰ উপৰি ডায়েবেটিছৰ চিকিৎসাৰ বাবে ব্যৱহাৰ কৰা এম্পাগ্লিফ্ল’জিন, চিটাগ্লিপ্টিন আৰু মেটফৰ্মিন এক্সটেণ্ডেড ৰিলিজ টেবলেটৰ খুচুৰা মূল্য প্ৰতি টেবলেট ১৪.৮৮ টকা নিৰ্ধাৰণ কৰা হৈছে।
অধিসূচনাত কোৱা হৈছে যে এই মূল্যত জিএছটি যোগ কৰা হোৱা নাই। যদি কোম্পানীসমূহ জিএছটিৰ অধীনত আছে, তেন্তে এই সৰ্বোচ্চ মূল্যৰ লগতে সংশ্লিষ্ট কোম্পানীয়ে প্ৰয়োজনীয় জিএছটি ল’ব পাৰিব। ইয়াৰ উপৰি নিৰ্ধাৰিত মূল্যতকৈ মূল্য বেছি হ’লে আইনী ব্যৱস্থা গ্ৰহণ কৰা হ’ব বুলিও কোৱা হৈছে।
