দিল্লীৰ এটা ভাড়াঘৰত থাকি তাৰ পৰাই ভাৰতৰ বিভিন্ন চহৰত আক্ৰমণৰ পৰিকল্পনা (Delhi Blast) কৰিছিল। ছাটাৰপুৰৰ উক্ত ভাড়াঘৰৰ পৰাই শনিবাৰে আৰক্ষীয়ে গ্ৰেপ্তাৰ কৰে চাৰিজন পাকিস্তানী হেণ্ডলাৰক। তদন্তকাৰীৰ সূত্ৰ অনুসৰি, গ্ৰেপ্তাৰ হোৱা চাৰিজন পাকিস্তানী হেণ্ডলাৰৰ ভিতৰত এজন হৈছে মুন্না জিংগাৰা।
এই মুন্না ডাউদ ইব্ৰাহিমৰ ‘সোঁহাত’ বুলি সূত্ৰটোৱে দাবী কৰিছে। তদন্তকাৰী সূত্ৰটোৱে জনোৱা মতে, মুন্নাৰ বাহিৰেও গ্ৰেপ্তাৰ হোৱা তিনিজন পাকিস্তানী হেণ্ডলাৰ হৈছে দিলৱাৰ খান, শ্বাহজাদ ভাটি আৰু আমিৰ জাট। সূত্ৰটোৱে দাবী কৰা মতে, ডাউদৰ ঘনিষ্ঠ মুন্নাই ভাৰতত আক্ৰমণৰ পৰিকল্পনাৰ ‘মাষ্টাৰমাইণ্ড’।
তেওঁৰ নিৰ্দেশত আক্ৰমণৰ বাবে প্ৰস্তুতি চলাইছিল সন্ত্ৰাসবাদীসকলে। অনুসন্ধানমূলক সূত্ৰ অনুসৰি, তেওঁলোকৰ লক্ষ্য তালিকাত আছিল পাৰমাণৱিক কেন্দ্ৰ, বিমানবন্দৰ, ধৰ্মীয় স্থান, ৰেল ষ্টেচন আৰু বিদ্যুৎ কেন্দ্ৰ। আটক কৰা লোকসকলৰ পৰা বৃহৎ পৰিমাণৰ বিস্ফোৰক আৰু অস্ত্ৰ-শস্ত্ৰ উদ্ধাৰ কৰা হৈছে।
আৰক্ষীৰ সূত্ৰ অনুসৰি, মুন্না ছাত্ৰ জীৱনৰ পৰাই অপৰাধৰ জগতখনৰ লগত জড়িত হৈ পৰে। ১৯৯০ চনত মুন্নাই মুম্বাইৰ যোগেশ্বৰী অঞ্চলৰ কলেজৰ বাহিৰত সহপাঠী এজনক হত্যা কৰাৰ অভিযোগ উত্থাপন হৈছিল।
অতি কম সময়ৰ ভিতৰতে মুন্না হৈ পৰে এসময়ত দাউদ ইব্ৰাহিমৰ ঘনিষ্ঠ ছোটা ৰাজনৰ ‘প্ৰিয় সংগী’। কেৱল সেয়াই নহয়, বিৰোধী গোট ছোটা চাকীলৰ অন্যতম ঘনিষ্ঠ সহযোগীও আছিল তেওঁ। ইছমাইল মালবাৰীৰ সহযোগত তেওঁ ‘ডি কোম্পানী’ত যোগদান কৰে। মুন্নাই শ্বাৰ্পশ্বুটাৰ হিচাপে অপৰাধৰ জগতখনত জনাজাত হৈ আহিছিল।
১৯৯৭ চনত ভাৰতীয় সেনাবাহিনীৰ এজন সদস্যক গুলীয়াই হত্যা কৰাৰ অভিযোগ উত্থাপন হৈছে। সেই বছৰতে তেওঁক গ্ৰেপ্তাৰ কৰা হৈছিল। ১৯৯৯ চনত জামিনত মুকলি হৈয়েই পাকিস্তানৰ কৰাচীলৈ পলায়ন কৰে। মুন্না ছোটা চাকীলৰ ‘ডেথ স্কোৱাড’ৰ অন্যতম সদস্য। ছোটা ৰাজনৰ সহযোগী কেইবাজনকো গুলীয়াই হত্যা কৰাৰ অভিযোগ উত্থাপন হৈছে।
ছোটা ৰাজনৰ সহযোগী ৰোহিত বাৰ্মাক হত্যা কৰাৰ অভিযোগত থাইলেণ্ডত ১৭ বছৰৰ কাৰাদণ্ড বিহা হৈছিল। কিন্তু পাকিস্তানে দাবী কৰে যে তেওঁ মহম্মদ চেলিম। ইয়াৰ পিছত থাইলেণ্ড প্ৰশাসনে মুন্নাক পাকিস্তানৰ হাতত গতাই দিয়ে।
