অসম বিধানসভাত বুধবাৰে ইউনিফৰ্ম চিভিল কোড বা ইউচিচি বা অভিন্ন দেৱানী বিধি (UCC Bill) সন্দৰ্ভত আলোচনা হ’ব। ইয়াৰ পূৰ্বে ৰাজ্যৰ বিভিন্ন প্ৰান্তৰ পৰা কেইবাটাও মুছলমান ধৰ্মীয় আৰু সামাজিক সংগঠনে বিজেপি চৰকাৰলৈ আবেদন দাখিল কৰিছে। সংগঠনকেইটাই প্ৰস্তাৱিত আইনখনলৈ আগবাঢ়ি যোৱাৰ পূৰ্বে সংখ্যালঘু জনগোষ্ঠীৰ (Minority community) সংশ্লিষ্ট অংশীদাৰসকলৰ সৈতে আলোচনা কৰিবলৈ ৰাজ্য চৰকাৰক আহ্বান (Appeal to the state government) জনাইছে। উল্লেখ্য য়ে সোমবাৰে অসম চৰকাৰে বিধানসভাত প্ৰস্তাৱিত ইউচিচি বিধেয়ক উত্থাপন কৰে।
কমেও ১০টা সংগঠনৰ নেতাই ৰাজ্য চৰকাৰক স্মাৰক-পত্ৰ দাখিল কৰাৰ সিদ্ধান্ত লৈছে। এই স্মাৰক-পত্ৰত আইন প্ৰৱৰ্তনৰ পূৰ্বে অধিক আলোচনাৰ দাবী উত্থাপন কৰা হৈছে।
আবেদনকাৰীৰ ভিতৰত আছে জমিয়ত উলেমা-ই-হিন্দ, জামাত-ই-ইছলামী, আহলে চুন্নত, মুছলিম ব্যক্তিগত আইন ব’ৰ্ড, নদৱাতুল তামিৰ, মিলি কাউন্সিল আৰু সদৌ অসম সংখ্যালঘু ছাত্ৰ সন্থাৰ দুটা ফৈদ।
ইউনিফৰ্ম চিভিল কোডৰ লক্ষ্য হৈছে ধৰ্ম নিৰ্বিশেষে সকলো নাগৰিকৰ বাবে বিবাহ, বিবাহ বিচ্ছেদ, উত্তৰাধিকাৰ আৰু দত্তক লোৱাৰ দৰে বিষয়সমূহ নিয়ন্ত্ৰণ কৰা ব্যক্তিগত আইনৰ এক উমৈহতীয়া গাঁথনি প্ৰৱৰ্তন কৰা। কিন্তু মুছলমান সংগঠনসমূহে যুক্তি আগবঢ়াইছে যে ৰাজ্য চৰকাৰে সুদূৰপ্ৰসাৰী সামাজিক আৰু আইনী প্ৰভাৱ থকা বিষয় এটাৰ সিদ্ধান্ত লোৱাৰ সময়ত সংখ্যালঘু সম্প্ৰদায়ৰ অংশীদাৰসকলৰ মতামতক আওকাণ কৰা উচিত নহয়।
উল্লেখ্য যে অসমৰ প্ৰস্তাৱিত অভিন্ন দেৱানী বিধিয়ে বহুবিবাহ নিষিদ্ধ কৰাৰ লগতে ‘লিভ-ইন’ সম্পৰ্ক (বিবাহ অবিহনে একেলগে থকা) পঞ্জীয়ন বাধ্যতামূলক কৰাৰ সম্ভাৱনা আছে।
