ষ্টাফ ৰিপ’ৰ্টাৰ
আজি শ্ৰীমন্ত কলাক্ষেত্ৰত অসমৰ ইতিহাস সৃষ্টিকাৰী ক্ৰীড়াবিদ লাভলীনা বৰগোঁহাইক ৰাজ্য চৰকাৰৰ তৰফৰ পৰা আনুষ্ঠানিকভাৱে সম্বৰ্ধনা জনোৱা হয়৷ অনুষ্ঠানত উপস্থিত থাকে মুখ্যমন্ত্ৰী ডঃ হিমন্ত বিশ্ব শৰ্মা, বিধানসভাৰ অধ্যক্ষ বিশ্বজিৎ দৈমাৰী, মন্ত্ৰী পৰিষদৰ সদস্যসকল, অৰ্জুন ভোগেশ্বৰ বৰুৱা, লাভলীনাৰ পিতৃ-মাতৃ-প্ৰশিক্ষকে ধৰি অসম অলিম্পিক সন্থাৰ বিষয়ববীয়া, বক্সিং সন্থাৰ বিষয়ববীয়া, ক্ৰীড়া বিভাগৰ বিষয়ববীয়াকে অন্যান্য সংশ্লিষ্ট বিষয়ববীয়াসকল৷ উক্ত অনুষ্ঠানত লাভলীনা বৰগোঁহাইক অসম চৰকাৰৰ তৰফৰ পৰা সম্বৰ্ধনা জনোৱা হয়৷ লগতে অসম অলিম্পিক সন্থা, বক্সিং সন্থাকে ধৰি সংশ্লিষ্ট বিভাগবোৰে সম্বৰ্ধনা জনায় ৷
উল্লেখ্য, ইতিমধ্যে অসম চৰকাৰে লাভলীনালৈ ১ কোটিটকাৰ পুৰস্কাৰৰ লগতে তেওঁৰ জন্মস্থানত এক অত্যাধুনিক ক্ৰীড়া প্ৰকল্পৰ কথা ঘোষণা কৰিছে৷ আজি সম্বৰ্ধনা অনুষ্ঠানত মুখ্যমন্ত্ৰীয়ে লাভলীনা বৰগোঁহাইক ৰাজ্যিক আৰক্ষীৰ ডিএছপি পদ গ্ৰহণ কৰিবলৈ আমন্ত্ৰণ জনায়৷ লগতে আগন্তুক পেৰিচ অলিম্পিক পৰ্যন্ত চাৰি বছৰত নিজৰ অলিম্পিক প্ৰস্তুতিৰ বাবে মাহিলি ১ লাখ টকাকৈ ক্ৰীড়া বৃত্তি দিয়াৰ কথাও ঘোষণা কৰে৷ আনহাতে, লাভলানীৰ প্ৰশিক্ষক তথা তেওঁক আজিৰ পৰ্যায়লৈ উলিয়াই অনা চাৰিগৰাকী ব্যক্তিকো ১০ লাখ টকাকৈ আৰ্থিক পুৰস্কাৰ প্ৰদানৰ কথা ঘোষণা কৰে ৷
লগতে লাভলীনাৰ নামত নিজৰ জন্মস্থান বৰপথাৰত এটি ২৫ কোটি টকীয়া অত্যাধুনি ক্ৰীড়া প্ৰকল্প নিৰ্মাণৰ কথাও ঘোষণা কৰে৷ উক্ত ক্ৰীড়া প্ৰকল্পত থাকিব এখন বক্সিং একাডেমীও৷ আনহাতে, এই একাডেমীৰ দায়িত্বত থাকিব লাভলীনাৰ প্ৰশিক্ষক তথা পিতৃ৷ ইফালে গুৱাহাটী মহানগৰত এটি পথ লাভলীনাৰ নামত নামকৰণ কৰা হ’ব বুলিও মুখ্যমন্ত্ৰীয়ে ঘোষণা কৰে৷
