ষ্টাফ ৰিপ’ৰ্টাৰ
নিষিদ্ধ ড্ৰাগছ আৰু ছিণ্ডিকেটৰ সৈতে জড়িত অভিযোগত গ্ৰেপ্তাৰ হোৱা ধুবুৰীৰ সীমান্ত শাখাৰ উপ-আৰক্ষীৰ অধীক্ষক যতীন চন্দ্ৰ দাসক ৫ দিনৰ আৰক্ষী জিম্মালৈ প্ৰেৰণ। কামৰূপৰ বিশেষ ন্যায়িক দণ্ডাধীশৰ আদালতে ৰক্ষকৰূপী ভক্ষক গৰাকীক আৰক্ষী জিম্মালৈ প্ৰেৰণ কৰিছে। উল্লেখ যে ধুবুৰী নৱ-নিযুক্ত অধীক্ষক অভিজিৎ দিলীপৰ নিৰ্দেশত সোমবাৰে গ্ৰেপ্তাৰ হয় খাকী পোচাকত কলংক লগোৱা আৰক্ষী বিষয়াগৰাকী। গ্ৰেপ্তাৰৰ পিছতে ৰাতিয়ে গুৱাহাটীলৈ অনা হয় উপ-অধীক্ষক গৰাকীক।
আদালতত হাজিৰ কৰাবলৈ অনা সময়ত সাংবাদিকৰ আগত গ্ৰেপ্তাৰ হোৱা দাসে কয়- ‘আদালতত প্ৰমাণ হ’ব। মোৰ ফালৰ পৰা মই প্ৰমাণ কৰিম। অভিযোগ দিলেই নহ’ব আদালতত প্ৰমাণ কৰিব লাগিব। মুখ থাকিলে কৈ দিব পাৰে। আদালতত কেচ উঠিলে প্ৰমাণ হ’ব’।
ধুবুৰী আৰক্ষী অধীক্ষকৰ নিৰ্দেশ মৰ্মে গ্ৰেপ্তাৰ কৰা বুলি সাংবাদিকে কৰা মন্তৱ্যত তেওঁ কয়-নিৰ্দেশ কাৰ ক’ব নোৱাৰো।
উল্লেখ, আদালতত হাজিৰ কৰোৱা সময়ত ধৃত আৰক্ষী বিষয়াগৰাকী মুখত নাছিল কোনো লজ্জাভাৱ। বিশেষকৈ অন্য অভিযুক্তক কৰ্টত হাজিৰ কৰোৱা সময়ত অভিযুক্ত হাতত হেণ্ডকাফ দেখিবলৈ পোৱা যায়। কিন্তু অসম আৰক্ষী গ্ৰেপ্তাৰ হোৱা বিষয়াগৰাকী হাতত নাছিল কোনো ধৰণৰ হেণ্ডকাফ। একেদৰে ধৃত আৰক্ষীৰ বিষয়াজনক কৰ্টত হাজিৰ কৰাবলৈ অনা মুহূৰ্তত অন্য সাধাৰণ অভিযুক্তৰ দৰে আৰক্ষীৰ কটকটীয়া বেহু মাজত ভৰাই অনাৰ বিপৰীতে আৰক্ষী বাহনৰ সন্মুখৰ চিটত বহুৱাই অনা হৈছিল। গ্ৰেপ্তাৰ হোৱা বিষয়াগৰাকী ৰাজ আতিথ্য দেখি একাংশ ৰাইজে সামাজিক মাধ্যমত বিভিন্ন প্ৰশ্নৰো অৱকাশ তুলিছে।
