এক বিশেষ সূত্ৰৰ পৰা লাভ কৰা তথ্যৰ ভিত্তিত ২৯নং ৰাষ্ট্ৰীয় ঘাইপথৰ ডিলাই গেটত নিয়মীয়া তালাচীৰ সময়ত মঙলবাৰে দিনৰ ১.৩০ বজাত নম্বৰ প্লেটবিহীন এখন অটো বাহনত তালাচী চলায়৷ বাহনখনত চালক সহিতে মুঠ পাঁচজন ব্যক্তি আছিল৷ তাৰে তিনিজন পুৰুষ আৰু দুগৰাকী মহিলা৷ মণিপুৰৰ পৰা গুৱাহাটী অভিমুখী অটোখনত অবৈধ সামগ্ৰী সৰবৰাহৰ সন্দেহত ৰখাই তালাচী চলোৱা হয়।
লগে লগে সন্দেহজনক তথ্য বোকাজান এছডিপিঅ’ আৰু আৰক্ষী অধীক্ষকক প্ৰদান কৰা হয়। লগে লগে বোকাজানৰ এছডিপিঅ’ আৰু ডিলাই আৰক্ষী থানাৰ ভাৰপ্ৰাপ্ত বিষয়া গৈ ঘটনাস্থলীত উপস্থিত হয়। ইয়াৰ পিছত বোকাজান এছডিপিঅ’ৰ কৰ্তৃত্বত বাহনখনত তালাচী চলোৱা হয়। তালাচীৰ সময়ত অটোখনৰ পিছৰ আসনৰ তলত থকা এটা গোপন কক্ষৰ পৰা মুঠ ১৩.৪৮২ কিলোগ্ৰাম ওজনৰ ১৪ পেকেট জেলি সদৃশ পদাৰ্থ উদ্ধাৰ কৰা হয়।
প্ৰাথমিক অনুমান অনুসৰি এই পদাৰ্থখিনি আফিং বুলি জানিব পৰা যায়৷ লগে লগে এই ঘটনাত জড়িত পাঁচজন লোকক গ্ৰেপ্তাৰ কৰা হয়৷ গ্ৰেপ্তাৰ কৰা লোককেইজন হৈছে মণিপুৰৰ মহম্মদ হাফিজুদ্দিন (৪২), মহম্মদ তাজুদ্দিন (৪৬), মহম্মদ ফৈজাল (২১), ইনাওচা বেগম (৫৬), পুশম আইজিংটি (১৯)৷ আনহাতে, উদ্ধাৰ কৰা সন্দেহজনক পদাৰ্থখিনি এনডিপিএছ আইন আৰু বিএনএছএছৰ অধীনত নিৰ্ধাৰিত প্ৰক্ৰিয়া অনুসৰণ কৰি আৰু নিৰপেক্ষ সাক্ষীৰ উপস্থিতিত জব্দ কৰা হয়।
লগতে এই সমগ্ৰ তালাচী আৰু জব্দ অভিযান ই-সাক্ষ্য এপ্লিকেচনৰ জৰিয়তে ভিডিঅ’গ্ৰাফ কৰা হয়। ইয়াৰ উপৰি ঘটনাস্থলীত জব্দ কৰা বাহনখনৰ গোপন কক্ষৰ পৰা আঙুলিৰ চাপো লোৱা হয়৷ তাৰ পিছত জব্দ কৰা নিষিদ্ধ সামগ্ৰী আৰু বাহনখনৰ সৈতে আটক কৰা লোককেইজনক প্ৰয়োজনীয় আইনী ব্যৱস্থা গ্ৰহণৰ বাবে ডিলাই আৰক্ষী থানালৈ অনা হয়।
