- যিকোনো অপশক্তিৰ বিৰুদ্ধে কঠোৰ হ’ব নগাঁও জিলা প্ৰশাসন- উপায়ুক্ত শইকীয়া
- চ’ছিয়েল মিডিয়াৰ ওপৰত তীক্ষ্ণ নজৰ ৰখা হৈছেঃ আৰক্ষী অধীক্ষক শংকৰব্ৰত ৰায় মেধি
ASSAM TIMES POST
নগাঁওঃ এন আৰ চিৰ বহু প্ৰত্যাশীত চূড়ান্ত তালিকা প্ৰকাশলৈ মাজত মাথোঁ এটা দিন বাকী থকা অৱস্থাত ৰাজ্যৰ আন ঠাইৰ লগতে নগাঁও জিলা প্ৰশাসনো সাজু হৈ উঠিছে। এই তালিকাখনক লৈ সৰ্বসাধাৰণ ৰাইজৰ মাজত বিৰাজ কৰিছে চৰম উৎকন্ঠা। ইয়াৰ মাজতে এন আৰ চিক লৈ যাতে জিলাখনত কোনো আইন শৃংখলা জনিত পৰিস্থিতিৰ উদ্ভৱ নহয়, তাৰ বাবে জিলা প্ৰশাসন আৰু আৰক্ষী বিভাগে যাৱতীয় সতৰ্কতামূলক ব্যৱস্থা গ্ৰহণ কৰিছে।
ইয়াৰ অংশ স্বৰূপে আজি জিলা প্ৰশাসনৰ উদ্যোগত নগাঁও চহৰৰ খগেন মহন্ত প্ৰক্ষাগৃহত এন আৰ চিৰ ওপৰত এখন সজাগতা সভা অনুষ্ঠিত হয়। জিলা উপায়ুক্ত যাদৱ শইকীয়াৰ সভাপতিত্বত অনুষ্ঠিত সভাখনৰ উদ্দেশ্যে ব্যাখ্যা কৰে এন আৰ চিৰ দায়িত্বত থকা অতিৰিক্ত উপায়ুক্ত জয়ন্ত কুমাৰ বৰাই।
সভাত ভাষণ প্ৰদান কৰি নগাঁৱৰ আৰক্ষী অধীক্ষক শংকৰব্ৰত ৰায় মেধিয়ে কয়, নগাঁও জিলাত ১৮৩ এন আৰ চি সেৱা কেন্দ্ৰত পুৰ্বৰে আৰক্ষীৰ লোক নিয়োজিত হৈ নিষ্ঠাৰে নিজৰ দায়িত্ব সম্পাদন কৰি আহিছে। খচৰা তালিকা তালিকা প্ৰকাশৰ সময়ত কোনো ধৰণৰ গোচৰ পঞ্জীয়ন হোৱা নাই বুলি উল্লেখ কৰি তেওঁ কয়, নিশ্চিত ভাবে অহা ৩১ আগষ্টৰ দিনা কোনো আইন শৃংখলা জনিত পৰিস্থিতিৰ উদ্ভৱ নহয়,মোৰ বিশ্বাস আছে।
চূড়ান্ত তালিকাত কাৰোবাৰ নাম নাথাকিলেও শংকিত হোৱাৰ কাৰণ নাই। কাৰণ নাম নাথাকিলেও কোনো কাৰণত সেইজন লোক বিদেশী নহয়। ৰাইজে কোনো উৰা বাতৰিক বিশ্বাস নকৰিবলৈ আৰক্ষী অধীক্ষক গৰাকীয়ে আহ্বান জনাই লগতে তেওঁ কয়যে, নগাঁও আৰক্ষী প্ৰশাসনে ছ’চিয়েল মিডিয়াৰ ওপৰত চোকা দৃষ্টি ৰাখিছে।
নিজৰ ভাষণত জিলা উপায়ুক্ত যাদৱ শইকীয়াই কয়, যদি কোনো অপশক্তিয়ে সমাজত বিভ্ৰান্তিৰ সৃষ্টি কৰি ৰাইজক বিপথে পৰিচালিত কৰিব বিচাৰে, তেন্তে তেনে ব্যাক্তিক কঠোৰ হাতেৰে দমন কৰা হ’ব। উপায়ুক্ত গৰাকীয়ে এন আৰ চি প্ৰকাশৰ ক্ষেত্ৰত সকলোকে শান্তি-শৃংখলা বজাই ৰাখি জিলা প্ৰশাসনক সহযোগিতা কৰিবলৈ আহ্বান জনায়।
উক্ত সভাত বিশিষ্ট শিক্ষাবিদ তথা জেষ্ঠ নাগৰিক তথা বিশিষ্ট ক্ৰীড়া সংগঠক সহজানন্দ উজা, জ্যেষ্ঠ সাংবাদিক ড: আবু হানিফাৰ লগতে কেবাটাও দল সংগঠনৰ প্ৰতিনিধিয়ে ভাষণ দিয়ে। সহস্ৰাধিক ৰাইজ উপস্থিত থকা সভাত নগাঁও সদৰ ৰাজহ চক্ৰ বিষয়া পঞ্চমী চৌধুৰীয়ে কয় যে, অসম চুক্তিৰ আধাৰত ৰাষ্ট্ৰীয় নাগৰিক পঞ্জী উন্নীতকৰণৰ কাম কৰা হৈছে।
ইপিনে, আজি পুৱাৰ ভাগত নগাঁও আৰক্ষী নিৱেশত আয়োজিত এক অনুষ্ঠানত আৰক্ষী আৰু নিৰাপত্তা বাহিনীৰ জোৱানক এন আৰ চি প্ৰকাশৰ ক্ষেত্ৰত পালন কৰিব লগা দায়িত্ব সম্পৰ্কে অবগত কৰোৱা হয়। আৰক্ষী অধীক্ষক শংকৰব্ৰত ৰায় মেধিয়ে জনোৱা মতে, ১৮৩টা এন আৰ চি সেৱা কেন্দ্ৰত এজনকৈ মুঠ ১৮৩ জন আৰক্ষী জোৱানক নিয়োজিত কৰা হৈছে।
এন আৰ চিৰ প্ৰকাশৰ ক্ষেত্ৰত হ’ব পৰিস্থিতি মোকাবিলা কৰিবৰ কাৰণে জিলাখনত ১০ টা নিৰাপত্তা বাহিনীৰ কোম্পানী নিয়োজিত কৰা হৈছে। ইয়াৰে ৭ টা বিএছ এফৰ, ২ টা এছ,এছ, বিৰ, ২টা আৰু ১ টা আই টি বি পিৰ কোম্পানী আছে।
