কংগ্ৰেছে ৰাইজৰ দলৰ (Raijor Dal-Congress) সৈতে থকা ৰাজনৈতিক মিত্ৰতা আনুষ্ঠানিকভাৱে ভংগ কৰাৰ পিছতে দুয়োটা দলৰ মাজত আৰম্ভ হৈছে তীব্ৰ বাকযুদ্ধ।
কংগ্ৰেছে অভিযোগ কৰিছে যে ৰাইজৰ দলৰ নেতৃত্বই মিত্ৰতাৰ নীতি-নিয়ম আৰু ৰাজনৈতিক শিষ্টাচাৰ উলংঘা কৰি কংগ্ৰেছ নেতা-কৰ্মীৰ বিৰুদ্ধে ব্যক্তিগত আক্ৰমণ আৰু অপপ্ৰচাৰ চলাই আহিছিল। মিত্ৰজোঁটৰ আন অংশীদাৰ দলসমূহৰ বিৰুদ্ধেও আপত্তিজনক মন্তব্য কৰা বুলি কংগ্ৰেছে অভিযোগ কৰিছে।
কংগ্ৰেছৰ এই সিদ্ধান্তৰ পিছতে ৰাইজৰ দলে নিজৰ প্ৰতিক্ৰিয়া প্ৰকাশ কৰে। দলটোৰ কাৰ্যকৰী সভাপতি ভাস্কো ডি শইকীয়া, সাধাৰণ সম্পাদক ৰাছেল হুছেইন আৰু চিন্ময় বৰাই কয় যে কংগ্ৰেছ আৰু ৰাইজৰ দলৰ মাজত মৌলিক আদৰ্শগত পাৰ্থক্য আছে।
ৰাইজৰ দলৰ মতে, বিজেপিক পৰাভূত কৰাৰ স্বাৰ্থতে কংগ্ৰেছৰ সৈতে মিত্ৰতা কৰা হৈছিল। কিন্তু কংগ্ৰেছে হিমন্ত বিশ্ব শৰ্মা চৰকাৰৰ বিৰুদ্ধে বিধানসভা আৰু সংসদত যথেষ্ট শক্তিশালী ভূমিকা গ্ৰহণ কৰা নাই বুলি দলটোৱে অভিযোগ কৰে।
অখিল গগৈ আৰু মেহবুব মুক্তাৰে বিধানসভাত চৰকাৰৰ বিৰুদ্ধে আক্ৰমণাত্মক স্থিতি গ্ৰহণ কৰাৰ সময়ত কংগ্ৰেছৰ বিধায়কসকলে তুলনামূলকভাৱে নীৰৱ ভূমিকা গ্ৰহণ কৰা বুলি ৰাইজৰ দলে দাবী কৰে।
ইয়াৰ উপৰি ৰাজ্যসভা আৰু ৰাষ্ট্ৰপতি নিৰ্বাচনত কংগ্ৰেছৰ একাংশ বিধায়কে দলীয় সিদ্ধান্তৰ বিপৰীতে ভোটদান কৰাৰ অভিযোগ উত্থাপন কৰি ৰাইজৰ দলে কংগ্ৰেছৰ দলীয় আনুগত্যক লৈও প্ৰশ্ন তোলে।
বান পৰিস্থিতিক লৈ কংগ্ৰেছ সাংসদ গৌৰৱ গগৈৰ ভূমিকাক লৈও ৰাইজৰ দলে সমালোচনা কৰে। বানপীড়িত অঞ্চলৰ ৰাইজৰ বাবে অধিক সক্ৰিয় ভূমিকা গ্ৰহণ কৰা উচিত আছিল বুলি দলটোৱে দাবী কৰে।
অৱশ্যে ৰাইজৰ দলৰ এই অভিযোগসমূহৰ বিপৰীতে কংগ্ৰেছৰ বিস্তৃত প্ৰতিক্ৰিয়া এতিয়াও প্ৰকাশ পোৱা নাই।
মিত্ৰতা ভংগৰ ফলত অসমৰ বিৰোধী ৰাজনীতিত নতুন সমীকৰণৰ সম্ভাৱনা সৃষ্টি হৈছে। আগন্তুক নিৰ্বাচনত দুয়োটা দল পৃথকে অৱতীৰ্ণ হ’লে বিৰোধী ভোটৰ বিভাজন ঘটিব নেকি, সেয়া এতিয়া বিশেষভাৱে লক্ষণীয় হ’ব।
