যোৰহাট জিলাৰ মৰিয়নীত সংঘটিত হৈছে এক চাঞ্চল্যকৰ কন্যাশিশু অপহৰণৰ ঘটনা (Girl kidnapped in Moriani)। এগৰাকী ৯ বছৰীয়া কন্যাশিশুক অপহৰণ কৰি ৬০ লাখ টকা মুক্তিপণ দাবী কৰাৰ অভিযোগ উত্থাপিত হৈছে। অৱশ্যে আৰক্ষীৰ তৎপৰতাত নিশা দেৰগাঁৱৰ ইছলামনগৰৰ পৰা শিশুটিক সুকলমে উদ্ধাৰ (Rescue the child) কৰিবলৈ সক্ষম হয়।
প্ৰাথমিক তথ্য অনুসৰি, মঙলবাৰে দুপৰীয়া শিশুটোৰ আত্মীয়ৰ ঘৰত উপস্থিত হৈছিল শিশুটোৰ মামা সাগৰ ঘোষ ওৰফে টাৰ্জেন আৰু মামীয়েক মনিষা ঘোষ। অভিযোগ অনুসৰি, তাৰ পিছতে কৌশলেৰে শিশুটিক লগত লৈ যায় দুয়োজনে।
কেইবা ঘণ্টা ধৰি শিশুটি ঘৰলৈ উভতি নহাত পৰিয়ালটোৰ মাজত হুৱাদুৱা লাগে। অভিযোগ অনুসৰি, সন্ধিয়া প্ৰায় ৫ বজাত অপহৰণকাৰীয়ে পৰিয়ালৰ সৈতে যোগাযোগ কৰি ৬০ লাখ টকা মুক্তিপণ দাবী কৰে। লগতে আৰক্ষীক খবৰ নিদিবলৈ সকীয়াই দিয়াৰ উপৰি নিশা ৮ বজাৰ ভিতৰত দাবী কৰা ধন আদায় নিদিলে শিশুটিক হত্যা কৰাৰ ভাবুকি দিয়াৰ অভিযোগ উঠিছে।
ঘটনাৰ পিছতে পৰিয়ালে সাংবাদিকৰ সৈতে যোগাযোগ কৰাৰ লগতে আৰক্ষীক অৱগত কৰে। ইয়াৰ পিছতে মৰিয়নী আৰক্ষীয়ে তৎপৰতাৰে অভিযান আৰম্ভ কৰে। অভিযানৰ ফলত নিশা প্ৰায় ২ বজাত দেৰগাঁৱৰ ইছলামনগৰৰ পৰা অপহৃত শিশুটিক উদ্ধাৰ কৰা হয়।
এই ঘটনাৰ সৈতে জড়িত থকাৰ অভিযোগত দুজন লোকক আটক কৰা হৈছে। তেওঁলোক হৈছে সাগৰ ঘোষ ওৰফে টাৰ্জেন আৰু ৱাচিম ৰহমান ওৰফে কনকাই। সাগৰ ঘোষক দেৰগাঁৱৰ কয়লাখাটাৰ পৰা আৰু ৱাচিম ৰহমানক দেৰগাঁৱৰ ইছলামনগৰৰ পৰা আটক কৰা হয়।
ইফালে, মনিষা ঘোষ, ৰাহুল আলী আৰু ‘ম’ন’ নামৰ আন তিনিজন লোক বৰ্তমানেও পলাতক বুলি জানিব পৰা গৈছে। ৰাহুল আলীৰ ঘৰ দেৰগাঁৱৰ ইছলামনগৰত আৰু ‘ম’নৰ ঘৰ দেৰগাঁৱৰ ফুকন নগৰত বুলি প্ৰাথমিকভাৱে জানিব পৰা গৈছে।
আৰক্ষীয়ে অপহৰণত ব্যৱহাৰ কৰা বুলি সন্দেহ কৰা এখন বেলেনো বাহন, নম্বৰ AS05B 9917, আৰু এখন ৰঙা স্কুটি, নম্বৰ AS05W 4263, জব্দ কৰিছে।
আনহাতে, অপহৰণৰ পূৰ্বে শিশুটোৰ মামা-মামীয়েকে মৰিয়নীৰ লোকনাথ ভৱনৰ ১০৯ নম্বৰ কোঠাত প্ৰায় তিনিদিন ধৰি বাহৰ পাতি থকাৰ তথ্যও পোহৰলৈ আহিছে।
ঘটনাটোৰ আঁৰত থকা প্ৰকৃত উদ্দেশ্য, অপহৰণৰ পৰিকল্পনা, মুক্তিপণ দাবীৰ সৈতে জড়িত যোগাযোগ আৰু পলাতক অভিযুক্তসকলৰ ভূমিকা সন্দৰ্ভত আৰক্ষীয়ে তদন্ত অব্যাহত ৰাখিছে।
